O‘zbekiston aholi daromadi o‘rtacha ko‘rsatkichdan yuqori bo‘lgan mamlakatlar qatoriga kirishni rejalashtirmoqda

Vladimir Norov BMT Bosh assambleyasining 77-sessiyasidagi nutqida so‘nggi yillarda O‘zbekistonda amalga oshirilayotgan keng ko‘lamli jadal demokratik islohotlarga to‘xtalib o‘tdi.

TIV matbuot xizmatining ma’lum qilishicha, 2022—2026-yillarga mo‘ljallangan Yangi O‘zbekistonning Taraqqiyot strategiyasining amalga oshirilish jarayoni haqida ma’lumotlar havola etildi. Mazkur dasturiy hujjat O‘zbekistonda o‘tgan besh yil ichida amalga oshirilgan islohotlar natijalaridan kelib chiqqan holda ishlab chiqilgan bo‘lib, u demokratik jarayonlarni chuqurlashtirish, qonun ustuvorligini ta’minlash, aholi turmush darajasi va sifatini oshirishga qaratilgan.

Bundan tashqari, Strategiya Barqaror rivojlanish maqsadlarini jadal va har tomonlama amalga oshirish bo‘yicha sa’y-harakatlarni kuchaytirishga qaratilgan.

Xususan, 2030-yilga kelib, O‘zbekiston kambag‘allik darajasini ikki baravar kamaytirish, barcha muhtojlarni qamrab olgan holda ijtimoiy himoya tizimi samaradorligini oshirish, oziq-ovqat xavfsizligini mustahkamlash, aholi daromadi o‘rtacha ko‘rsatkichdan yuqori bo‘lgan mamlakatlar qatoriga kirishni rejalashtirmoqda.

Bosh assambleya 77-sessiyasi ishtirokchilarining e’tibori O‘zbekistonda amalga oshirilayotgan Konstitutsiyaviy islohotlarga qaratildi. Mazkur jarayonlarning asosiy ma’no va mazmuni “Inson sha’ni va qadr-qimmati uchun” tamoyilida aks etgani ta’kidlandi.

Mavzuga doir: “Afg‘oniston iqtisodiyotini tiklash xalqaro hamjamiyatning umumiy ustuvor yo‘nalishi bo‘lishi kerak” — Vladimir Norov