O‘zbekiston, Qozog‘iston, Qirg‘iziston hamda Tojikistonning 25 nafar davlat va xususiy sektor vakillari Fransiya va Estoniyaga o‘quv safarida elektron navbatlarni boshqarish tizimini (e-QMS) joriy etish bo‘yicha tajribalarini o‘rgandi. Bu haqda Xalqaro savdo markazi xabar bermoqda.
e-QMS an’anaviy jismoniy navbatlarga raqamli yechimlarni taqdim etadi, chegara va transport terminallarida trafikni optimallashtirishga yordam beradi.
Bundan tashqari u kutish vaqtini qisqartiradi va transport oqimlarini soddalashtiradi. Tizim uzoq vaqtdan beri Yevropaning bir qancha davlatlarida qo‘llanilmoqda.
Bu mahalliy korxonalar uchun pul va vaqtni tejashda samarali ekanligini isbotladi, chunki tizim eksport operatsiyalarini yaxshiroq rejalashtirish imkonini beradi.
Bojxonadagi kechikishlar Markaziy Osiyo mintaqasi va Yevropa Ittifoqi bilan savdo qilishdagi asosiy to‘siqlardan biri hisoblanadi.
Xalqaro Savdo Markazi (ITC) tomonidan yaqinda o‘tkazilgan so‘rovda barcha respondentlarning 75 foizdan ortig‘i chegaradan o‘tish punktlarida uzoq navbatlar va kechikishlarni qayd etgan.
Estoniya va Fransiyada qo‘llaniladigan elektron e-QMS kabi tizimni joriy etish ushbu to‘siqlarni bartaraf etishga yordam beradi. Ikki davlat ham hukumat, ham xususiy sektor darajasida e-QMS’ni muvaffaqiyatli joriy etishning yaxshi namunasidir.
Estoniya hukumati bozorda mavjud bo‘lgan e-QMS yechimlaridan birini yaratdi va uni chegarada amalga oshirdi. Fransiyada xususiy sektor logistika omborlarida biznes operatsiyalarini soddalashtirish uchun elektron SMS’dan muvaffaqiyatli foydalanmoqda.
O‘quv safari 2022-yil 5—10-sentabr kunlari bo‘lib o‘tdi hamda savdo, bojxona va logistika masalalari bilan shug‘ullanuvchi Markaziy Osiyo ekspertlariga Fransiya va Estoniyadagi hamkasblaridan o‘rganish imkonini berdi.
Sayohat Yevropa Ittifoqi tomonidan moliyalashtirilgan Ready4Trade Markaziy Osiyo loyihasi doirasida tashkil etildi.
Yevropa Ittifoqi tajribasi xalqaro savdoni boshqarishni raqamli yechimlar yordamida qanday soddalashtirish mumkinligiga misoldir, — dedi Yevropa Ittifoqining Qozog‘istondagi delegatsiyasining dastur menejeri Youri Skaskevich.
Loyiha haqida
Ready4Trade Central Asia – Yevropa Ittifoqi tomonidan moliyalashtiriladigan to‘rt yillik loyiha hisoblanadi.
Loyiha Xalqaro savdo markazi tomonidan milliy hamkorlar bilan yaqin hamkorlikda amalga oshirilib, mamlakatlarda mintaqalararo va xalqaro savdoni kuchaytirish orqali Markaziy Osiyoning umumiy barqaror va inklyuziv iqtisodiy rivojlanishiga hissa qo‘shishga mo‘ljallangan.
Ready4Trade Central Asia loyihasining benefitsiarlari qatoriga hukumatlar, kichik va o‘rta korxonalar, xususan, ayollar boshchiligidagi korxonalar va biznesni qo‘llab-quvvatlovchi tashkilotlar kiradi.
Izoh (0)