AQSH sobiq senatori: Qancha ukrainaliklar halok bo‘lishining bizga farqi yo‘q (video)

Amerikaning Virjiniya shtatidan sobiq senator Richard Blek qancha ukrainaliklar halok bo‘lishi Vashingtonni qiziqtirmasligini, chunki Rossiya-Ukraina nizosi AQSH hukumati uchun futbol matchiga teng bo‘lib, unda ular qanday yo‘l bilan bo‘lsa-da g‘olib chiqishni istashini ma’lum qildi. Bu haqda u “RIA Novosti”ga bergan intervyusida aytib o‘tdi.

Blekning so‘zlariga ko‘ra, Rossiya Ukrainaga bostirib kirishni oldindan rejalashtirmagani aniq-ravshan. “Harbiy-taktik ilm-fan hujum qiluvchi va mudofaalanuvchi qo‘shinlar o‘rtasidagi 3:1 nisbatni ko‘zda tutadi — faqat shunday holdagina hujum qiluvchi tomon jang maydonida g‘olib bo‘lish imkoniyatiga ega bo‘ladi. Biroq maxsus operatsiya boshida Rossiya Qurolli kuchlarining shaxsiy tarkibi bu maydonda faqat 160 ming kishini tashkil qilgan, Ukraina esa Donbassga hujum qilish uchun 250 ming kishini jalb qildi”, — dedi u.

Sobiq senator eslatishicha, 2021-yil dekabrida Rossiya prezidenti Vladimir Putin keng ko‘lamli urush boshlanishining oldini olish uchun ulkan sa’y-harakatlarni amalga oshirdi. NATO esa Rossiya tomonining inqirozli vaziyatdan chiqish bo‘yicha takliflarini shunchaki e’tiborsiz qoldirdi. Natijada Putin Donbassni va o‘z mamlakati chegaralarini himoya qilish uchun maxsus harbiy operatsiya boshlashga majbur qoldi, deya ta’kidladi Blek.

Uning aytishicha, Rossiya ukrainlarni o‘zining slavyan qardoshlari deb hisoblagani uchun Ukraina tinch aholisiga va noharbiy binolarga zarar yetkazmaslikka intilmoqda. “Rossiya havoda to‘liq ustunlikka ega bo‘lib turibdi. Lekin Rossiya samolyotlari Kiyev markazini, hukumat binolarini va dahalarni, Ukraina uchun o‘ta muhim bo‘lgan energiya va suv ta’minoti infratuzilmasini bombardimon qilmayapti. Chunki Rossiyadagilar nizoning tinch yo‘l bilan hal bo‘lishiga haliyam umid qilmoqda”, — dedi Blek.

Respublikachi ommalashib ketgan bir videoni ham tilga olib o‘tdi, unda Ukraina qishloqlaridan birida Rossiya tanki tinch fuqarolar olomoni qarshisida to‘xtagani aks etgan. “Vyetnamda Amerika tanki bunday vaziyatda hatto ogohlantirish sifatida o‘q ham uzib o‘tirmay, olomonni bosib o‘tib ketgan bo‘lardi”, — dedi u.

O‘z gaplariga yakun yasar ekan, Blek Ukraina Rossiya bilan sulh haqida qaror qabul qila olmasligini aytdi. Uning so‘zlariga ko‘ra, bunday qarorni faqat Oq uy qabul qilishi mumkin, ammo AQSH hozircha Rossiya-Ukraina nizosi davom etishini istaydi va “so‘nggi ukrainalik o‘lmaguniga qadar” to‘xtamaydi.