O‘zbekiston Bosh konsulxonasi xodimlari migratsiya sohasida ilmiy anjuman o‘tkazish maqsadida Rossiya Fanlar akademiyasining Ural bo‘limi iqtisodiyot instituti direktori Y.Lavrikova bilan muzokara o‘tkazdi. Bu haqda Dunyo axborot agentligi xabar qildi.
Qayd etilishicha, uchrashuvda O‘zbekiston va Rossiya o‘rtasidagi ikki tomonlama munosabatlarning bugungi holati va istiqbollari hamda mehnat migratsiyasi sohasida amalga oshirilgan ishlar to‘g‘risidagi ma’lumot almashilgan.
Institut rahbariyatiga Rossiyada mehnat faoliyatini amalga oshirayotgan O‘zbekiston fuqarolarining iqtisodiy, ijtimoiy va kundalik muammolari hamda ularni yechish yo‘llariga bag‘ishlangan ilmiy tadbir o‘tkazish taklifi bildirilgan. Mavjud muammolarni o‘rganish maqsadida rejalashtirilgan tadbirga migrantlar, diaspora vakillari, Rossiya huquq-tartibot idoralari vakillari, inson huquqlari bo‘yicha mutaxassislarni jalb etish ko‘zda tutilmoqda.
Y.Lavrikova ushbu taklifni qo‘llab-quvvatlashini ta’kidlagan. Uning aytishicha, institut xodimlari tomonidan amalga oshirilayotgan ilmiy tadqiqot ishlari doirasida MDH davlatlaridan kelgan mehnat muhojirlari o‘rtasida qator so‘rovlar o‘tkazilmoqda.
Muloqot natijasida mehnat migratsiya masalalariga bag‘ishlangan birinchi ilmiy anjumanni joriy yil sentabr oyida o‘tkazishga kelishib olingan.
Izoh (0)