“Bu texnik xatolikmi yo atayin qilinganmi, hali bila olmadik”. “Ekologuz” jamoasi xodimlari Ekoqo‘mita Telegram-kanalidan bloklangani aytilmoqda

Telegram’dagi “Ekologuz” kanali jamoadagi bir qancha xodimlarining Davlat ekologiya qo‘mitasi Telegram-kanaliga kirishi cheklangani, qo‘mita xodimlarni bloklagani haqida xabar qildi. Ekoqo‘mita matbuot xizmati holat bo‘yicha tushuntirish bilan chiqdi.

“Ekologuz” jamoasi rahbari Nargiza Qosimova “Daryo” muxbiri bilan suhbatda 2 nafar xodimning kanalga kirishi cheklanganini aytib, bu holat nega yuz berganini tushunmasligini bildirdi.

“Daryo” muxbirining “Ushbu bloklanish aynan yuqoridagi tanqidiy post ortidan yuz bergan bo‘lishi mumkinmi? Avval ham qo‘mita tomonidan cheklov va bosimlar bo‘lib turarmidi?” qabilidagi savoliga jamoa rahbari quyidagicha javob berdi:

Ha, negadir shunga to‘g‘ri kelyapti. Shu paytgacha bloklanmagan edik. Bu holat texnik xatolikmi yoki atayin qilinganmi, hali bilolmadik.

Shu paytgacha bunday holat sodir bo‘lmagan. Kanalimizga kelib tushayotgan murojaatlarga qo‘mita va uning viloyat boshqarmalari munosabat berib, muammolarni bartaraf etib kelgan.

Balki texnik xatolikdir. Ammo mana shu xatolik aynan kechagi voqealarga to‘g‘ri kelishi — ajablanarli.

Ekologiya va atrof-muhitni muhofaza qilish davlat qo‘mitasi matbuot xizmati esa qo‘mitaning rasmiy Telegram-kanali hech kim uchun bloklanmaganini ma’lum qildi. Qayd etilishicha, texnik sabablarga ko‘ra nosozlik yuzaga kelgan.

Hozirgi vaqtda ushbu muammoni bartaraf etish bo‘yicha tegishli choralar ko‘rilmoqda.

Shu munosabat bilan, foydalanuvchilarimizdan texnik nosozliklar bartaraf etilgunga qadar tekshirilmagan ma’lumotlarni tarqatmaslikni iltimos qilamiz, — deyiladi xabarda.