Elektr narxlari rekord darajaga yetgan sari Yevropa energetika inqirozi kuchaymoqda

11-avgust kuni Yevropada elektr energiyasi narxlari yangi rekord darajaga ko‘tarildi. Bu haqda Bloomberg xabar bermoqda.

Yevropa qish uchun gaz zahiralarini to‘ldirishga harakat qilayotgan bir paytda, Rossiya yetkazib berishni qisqartirdi.

Yadro reaktorlarida ishlab chiqarishning pasayishi, shuningdek, shamol va gidroenergetikaning quvvati pastligi sabab ham energiyaga bo‘lgan talab to‘liq qondirilmayapti.

Yevropa energiya birjasida Germaniyaning kelasi yildagi benchmark quvvati 4,5 foizga oshib, rekord darajadagi megavatt/soatiga 446 yevroga yetdi. Fransiya shartnomasi esa 4,4 foizga oshdi va birinchi marta 600 yevroga yetdi.

Bu yozdagi jazirama to‘lqinlar energiyaga bo‘lgan talabni kuchaytirdi, shu bilan birga ta’minotdagi uzilishlarga sabab bo‘ldi.

Shuningdek, gidroenergetika, atom stansiyalarini sovutish va energiya mahsulotlarini tashish uchun foydalaniladigan asosiy suv yo‘llari qurib qoldi.

Yevropa bo‘ylab rekord darajadagi kam yadroviy energiya ishlab chiqarish va past gidro rezervuarlar ta’minot tanqisligini yuzaga keltiradi, buni faqat ko‘mir va gaz kabi manbalar bilan qoplash mumkin, — deydi Bloomberg Intelligence tahlilchisi Patrisio Alvares.

Unga ko‘ra, bu Rossiyadan yetkazib berish kamayib borayotgan bir paytda gaz talabining barqarorligini oshiradi.

Avvalroq Yevropadagi energiya inqirozi fonida oziq-ovqat narxlari keskin ko‘tarilib borayotgani haqida xabar berilgandi.