Shavkat Mirziyoyev 10-avgust kuni Toshkent shahrining Yunusobod tumanidagi “Sobirobod” mahallasiga bordi. Bu haqda Prezident matbuot xizmati xabar qildi.
Qayd etilishicha, bu yerda 10 mingga yaqin aholi yashaydi. Mahallabay tizim natijasida ijtimoiy muhim masalalar hal etilmoqda. Ko‘p qavatli uylarning qiyofasi yangilandi, yo‘laklari, kommunikatsiya tarmoqlari ta’mirlangan.
Mahalla hududidan o‘tuvchi Yuqori Qoraqamish kanali atrofi ilgari qarovsiz, ko‘rimsiz joy bo‘lgan. Endilikda piyodalar uchun ko‘priklar, bolalar o‘yingohi va sport maydonchalari, velosiped yo‘lagi, favvora qurilgan. O‘rindiqlar, shaxmat stoli, charxpalak o‘rnatilgan. Daraxtlar ekilib, chimlar yotqizilgan. Kanal atrofidagi hududda 300 metr uzunlikdagi ishkomlar o‘rnatilib, uzumlar ekilgan.
Davlat rahbari ushbu sharoitlarni ko‘zdan kechirgan. Mahalla faollari, nuroniylar bilan suhbatlashgan.
“Hozir mahalla faollari katta bir ‘komanda’ bo‘ldi. Raisning yonida o‘rinbosarlari, hokim yordamchisi, yoshlar yetakchisi, profilaktika noziri bor. Bo‘lgandayam, oyligi, sharoiti, vakolati bilan bor. Endi shunday munosabatga javoban mas’uliyat ham bo‘lishi kerak. Jamiyatdagi o‘zgarishlarda mahalla tashabbuskor, xalqqa yelkadosh bo‘lishi kerak”, – deydi Shavkat Mirziyoyev.
“Sobirobod” mahallasining o‘sish nuqtasi — tadbirkorlik. Bu yerda o‘nlab subyektlar – ishlab chiqarish korxonalari, maishiy xizmat shoxobchalari, xususiy klinikalar, oziq-ovqat do‘konlari faoliyat ko‘rsatmoqda.
Shu yerda bosh vazir o‘rinbosarlari mahalla faollari oldida Yunusobod tumaniga qancha investitsiya jalb etilishi, qancha ish o‘rni yaratilishi bo‘yicha axborot bergan.
Izoh (0)