AQSH va Hindiston harbiy xizmatchilari oktabrda Hindistonning Uttarakxand shtatidagi qo‘shma harbiy mashg‘ulotlarda qatnashadi, ushbu shtat Hindiston va Xitoy chegarasi o‘tgan bahsli hudud yaqinida joylashgan, deb yozadi CNN Hindiston armiyasidagi yuqori mansabli manbalariga tayanib.
Mashg‘ulotlar yuqori balandlikdagi jangovar tayyorgarlikka qaratiladi, ular Haqiqiy nazorat chizig‘idan taxminan 95 km uzoqlikda 10 ming fut (3 ming metr) balandlikda bo‘lib o‘tadi.
Pentagon CNN’ga ma’lum qilishicha, Hindiston bilan sheriklik AQSH uchun erkin va ochiq Hind-Tinch okeani mintaqasi bo‘yicha umumiy qarashlarning “eng muhim unsurlaridan biri” hisoblanadi. Amerika va Hindiston armiyalari o‘rtasidagi mashg‘ulotlar mintaqaviy xavfsizlikni ta’minlash uchun “tezkorlik jihatidan muvofiqlik”ni yaxshilash imkonini beradi, degan fikrda Pentagon.
Hindiston va Xitoy chegarasidagi demarkatsiya chizig‘i 1962-yilda, chegara urushidan keyin o‘tkazishgan, uning uzunligi 4 ming kilometrdan oshadi. Chiziq bo‘yicha ikki davlatning haqiqiy chegarasi o‘tadi, ammo ushbu hududda ular o‘rtasida umumiy tan olingan chegara yo‘q, tomonlar bu hudud borasida bahslashib keladi.
May oyida Hindiston TIV Nyu-Deli Pekin tomonidan bosib olingan deb hisoblaydigan bahsli hududda Xitoy Pangong ko‘lini kesib o‘tuvchi ikkinchi ko‘prikni qurayotganini ma’lum qilgandi. Iyunda AQSHning Tinch okeanidagi quruqlik qo‘shinlari qo‘mondoni Charlz Flinn Hindistonga tashrifi chog‘ida Xitoy tomonidan Hindiston bilan chegarada harbiy infratuzilma rivojlantirilishini “xavotirli” va “ibratli” deb atagan edi. Xitoy o‘shanda amerikalik generalning tashrifini “alangani puflab kuchaytirish”ga urinish deb baholagan edi.
Xitoy va Hindiston harbiylari o‘rtasida bir necha marta to‘qnashuvlar yuz bergan, ularning so‘nggilaridan biri 2020-yil iyunida bo‘lib o‘tgandi. Jang qariyb olti soat davom etgan, o‘qotar qurollar emas, faqat tayoq, tosh va mixli dubinkalar qo‘llanilgan. 20 nafar hind harbiysi halok bo‘lgan, Xitoy tomonidagi qurbonlar soni noma’lum. Hindiston TIV voqeada Xitoyni ayblagan.
O‘tgan yil dekabrida Pentagon demarkatsiya chizig‘i yaqinida xitoylik harbiylar to‘planganini qayd etgan, bu idora xodimlarida xavotir uyg‘otgan edi. Tashvishga Xitoy strategik bombardimonchilarining chegara yaqiniga joylashtirilishi sabab bo‘lgan. Vashington Nyu-Deli bilan “barcha darajalarda” muloqot olib bormoqda, AQSH Hindiston bilan Xitoy harbiylarining harakatlanishi haqidagi razvedka ma’lumotlari bilan ko‘proq bo‘lisha boshladi.
Izoh (0)