“Qaysi lavozimda bo‘lishdan qat’i nazar, inson roziligi uchun ishlashimiz kerak” – Senat raisi
Oliy Majlis Senatining 29-yalpi majlisi bugun, 5-avgust kuni o‘z ishini davom ettirdi. Bu haqda “Daryo” muxbiri xabar bermoqda. Majlis avvalida senatorlarning Senat qarorlari ijrosi va boshqa muammoli masalalar bo‘yicha chiqishlari muhokama qilindi.
Senatning Mudofaa va xavfsizlik masalalari qo‘mitasi raisi Qutbiddin Burhonov Toshkent viloyati O‘rtachirchiq tumanidagi bir nechta qishloq aholisi uzoq yillardan beri ichimlik suvi masalasida qiynalib kelayotganini, ushbu masalani o‘rganish natijasi bo‘yicha “O‘zsuvta’minot” aksiyadorlik kompaniyasiga senator so‘rovi yuborilganini ta’kidladi.
So‘rov yuborilganidan keyin suvdan qiynalayotgan o‘sha mahallalarga 12,7 kilometr suv quvurlari yotqizilgan. Biroq odamlarga suv yetib bormagan. Ya’ni ish o‘lda-jo‘lda qoldirilgan. Bu masala bo‘yicha ikkinchi bor senator so‘rovi yuborilganda, “O‘zsuvta’minot” tomonidan bu maqsadda mablag‘ ajratilmagani bahona qilingan.
Senat raisi Tanzila Norboyeva senatorlar tomonidan ko‘tarilayotgan masalalar bejiz emasligini aytdi.
“Qaysi lavozimda bo‘lishdan qat’i nazar, biz inson roziligi uchun ishlashimiz kerak. Hamma harakatimiz shunga qaratilgan. Bugun ko‘tarilgan masalalar muammolarning ayrimlari, xolos. Bunaqa masalalar har kuni ko‘tarilmoqda. Lekin senatorlar imkoniyat darajasida joylardagi ijro organlari bilan birga hal qilganlarini bu yerda aytib o‘tirmaydi. Bu yerda yuqori darajada, ya’ni Vazirlar Mahkamasi, vazirlik, idoralarga taalluqli bo‘lgan masalalar ko‘tariladi. Xalqning muammolari hukumatga yordam sifatida ko‘tarib chiqilyapti. Albatta, bularni e’tiborga olishingizni so‘raymiz. Biz birgalikda ishlab, xalqning roziligini ta’minlashimiz shart”, – dedi rais.
Majlis davomida aholini qiynayotgan muammolarga yechim topish davlat darajasida talab qilinayotgan bir paytda ishga sovuqqonlik bilan qaralishi, odamlar uchun hayot-mamot bo‘lgan suv muammosi hal etilmasligi, qolaversa, “O‘zsuvta’minot” aksiyadorlik kompaniyasi rahbarining senator so‘roviga bepisandligi majlisda tanqid ostiga olindi.
