Samarqandda haydovchilardan “o‘lpon” talab qilib kelganlar 10 sutkaga qamaldi

Samarqand viloyati Past Darg‘om tumanida haydovchilardan “o‘lpon” talab qilganlar qo‘lga olindi.

“Qator terak” mahallasida yashovchi 1994-yilda tug‘ilgan X.Sh. va Juma shahri “Sazag‘an” mahallasida yashovchi 1993-yilda tug‘ilgan J.Sh.lar spirtli ichimlik ta’sirida, mast holatda, jamoat joyi hisoblangan “Juma avto bosh bekati”da, o‘ziga oldindan tanish bo‘lgan “Beklar” mahallasida yashovchi 1983-yilda tug‘ilgan Samarqand–Juma yo‘nalishida kirakashlik qiluvchi J.B. bilan, ularga yo‘nalishga chiqishi uchun pul to‘lamaganini vaj qilib, janjal qilmoqchi bo‘lishgan.

Tuman IIB xodimlari tomonidan olib borilgan tezkor tadbirlar natijasida, janjalni tashkil qilmoqchi bo‘lgan shaxslar shu bekatda kirakashlik bilan shug‘ullanuvchi haydovchilardan “o‘lpon” talab qilish bilan shug‘ullanishlari aniqlangan.

Shundan so‘ng, tadbir tashkil qilinib, janjal bo‘lishi mumkin bo‘lgan joyga maxsus guruh bilan chiqilib, holatga aloqador barcha shaxslar qo‘lga olingan.

Mazkur holat yuzasidan yuqoridagi shaxslarga nisbatan 10 (o‘n) sutkadan ma’muriy qamoq jazosi tayinlangan.

Hozirda avtoturargohlarni noqonuniy ravishda egallab olib, haydovchilardan pul talab qilib kelayotgan guruhlarni aniqlash bo‘yicha tadbirlar davom ettirilmoqda.