Ганада ўлимга олиб келувчи Марбург вируси билан касалланиш бўйича дастлабки икки ҳолат расман тасдиқланди. Бу ҳақда Reuters хабар берди.
Гана соғлиқни сақлаш хизматининг хабар беришича, беморлар яқинда жанубий Ашанти минтақасидаги шифохонада вафот этган. Шу ой бошида уларнинг намуналарида Эбола вирусига ўхшаш ўта юқумли касаллик борлиги аниқланган эди. Бу Марбург вируси экани тасдиқланди.
Ғарбий Африка мамлакати соғлиқни сақлаш расмийларининг айтишича, айни пайтда 98 киши беморлар билан алоқада бўлганликда гумонланиб карантинга олинган.
«Гана соғлиқни сақлаш идоралари эҳтимолий эпидемияга тайёргарлик кўриш орқали касалликка тезда жавоб берди. Бу яхши, чунки зудлик билан ва қатъий чоралар кўрилмаса, Марбург осонгина назоратдан чиқиб кетиши мумкин», — деди ЖССТнинг Африка бўйича минтақавий директори Мацҳидисо Моэти.
Марбургнинг давоси ҳозирча йўқ, бироқ шифокорларнинг айтишича, кўп сув ичиш ва муайян симптомларни даволаш беморнинг омон қолиш имкониятини оширади. Вирус одамларга мевахўр кўршапалаклар орқали юқади ва тана суюқликлари орқали одамлар орасида тарқалади. Касаллик бош оғриғи, иситма, мушак оғриғи, қусиш ва қон кетиши каби аломатлар билан оғир кечади, кўпинча ўлимга олиб келади.
ЖССТ маълумотларига кўра, Африкада олдинги эпидемиялар ва вақти-вақти билан учрайдиган касалланиш ҳолатлари Ангола, Конго, Кения, Жанубий Африка ва Угандада қайд этилган. Марбург инфекциясининг биринчи эпидемияси 1967 йилда Германияда юз берган — етти киши вафот этган. Умуман олганда, аввалги эпидемияларда ўлим даражаси вирус штамми ва вазиятни бошқаришга қараб 24 фоиздан 88 фоизгача бўлган.
Изоҳ (0)