Ukraina prezidenti Vladimir Zelenskiy harbiylarga hozir Rossiya armiyasi nazorati ostida bo‘lgan janubiy qirg‘oqbo‘yi hududlarni jang bilan qaytarib olishni buyurgan, deb yozadi “RBK” Ukraina mudofaa vaziri Aleksey Reznikovga tayanib.
“Bu siyosiy jihatdan mamlakatimizga juda zarur ekanini tushunamiz. Prezident oliy harbiy bosh qo‘mondonga reja ishlab chiqishni topshirdi”, — deya aniqlik kiritdi u.
Reznikovning so‘zlariga ko‘ra, buning uchun Ukraina qurolli kuchlari G‘arb qurol-yarog‘lari bilan ta’minlangan “millionlab jangovar kuchlar”ni to‘plamoqda.
Bosh vazir o‘rinbosari Irina Vereshchuk 10-iyul, yakshanba kuni Xerson va Zaporojye viloyatlari aholisini evakuatsiya qilishga, shu jumladan, Qrim orqali ham o‘tishga chaqirgandi. “Bu Ukraina qurolli kuchlari hujum harakatlari chog‘ida tinch fuqarolarni xavf ostiga qo‘ymasligi uchun kerak”, — deya aniqlik kiritgandi u.
Shu bilan birga, bosh vazir o‘rinbosari hujum “qanday vaqt oraliqlarida” o‘tkazilishini bilmasligini aytdi.
Bungacha Vereshchuk Rossiya kuchlari nazorati ostida bo‘lgan janubiy Ukraina hududlari aholisini Kiyev nazoratidagi hududlarga evakuatsiya qilishga bir necha marta da’vat etgandi.
Hozir Xerson viloyati, shuningdek, Zaporojye viloyatining markaziy va janubiy qismlari to‘liq Rossiya qurolli kuchlari nazorati ostida bo‘lib turibdi. Ushbu hududlarda harbiy-fuqarolik ma’muriyatlari tuzilgan.
10-iyul kuni Reznikov front chizig‘i bo‘ylab qo‘shinlar kamaygani tufayli, Ukraina qo‘shimcha qurol-yarog‘lar yetkazib berilishiga ehtiyojmand ekanini aytgandi.
Shu paytgacha AQSH Kiyevga HIMARS baravar o‘t ochish reaktiv tizimlarini bir necha o‘n kilometr masofaga otiluvchi snaryadlar bilan birga yetkazib bergandi. Endi Ukraina 300 kilometrgacha masofali ATACMS tezkor-taktik raketa majmualarini olishga umid qilmoqda, ammo AQSH hozircha rozi bo‘lmayapti.
Rossiya Mudofaa vazirligi iyul boshida Ukraina armiyasi barcha yo‘nalishlarda sezilarli talafotlarni boshidan kechirayotganini da’vo qilgandi. Idora ma’lum qilishicha, Ukrainaning 220 dan ortiq samolyotlari, 130 dan ziyod vertolyotlari, 3,8 mingta tanki, 3 mingta dala artilleriyasi qurollari va minomyotlari yo‘q qilingan.
Eslatib o‘tamiz, AQSH prezidenti Jo Bayden Ukrainaga qariyb 400 million dollar miqdorida qo‘shimcha harbiy yordam ajratishni topshirdi. AQSH Mudofaa vazirligi aniqlik kiritishicha, ushbu yordam paketiga to‘rtta HIMARS baravar o‘t ochish reaktiv tizimi va uning o‘q-dorilari, uchta taktik transport vositasi, 155 millimetrli artilleriya o‘q-dorilari, portlatuvchi o‘q-dorilar, kontrbatareya kurash tizimlari, harbiy texnika uchun ehtiyot qismlar va boshqa uskunalar kiradi.
Izoh (0)