Buyuk Britaniya tashqi ishlar vaziri Liz Trass Konservativ partiya yetakchisi va mamlakat bosh vaziri lavozimiga o‘z nomzodini qo‘ydi, deb yozadi “RBK”. Bu haqda u The Telegraph uchun yozgan maqolasida ma’lum qildi.
“Men o‘z nomzodimni ilgari suryapman, chunki odamlarni o‘z ortimdan ergashtira olaman, va’dalarimni bajara olaman va murakkab qarorlarni qabul qila olaman”, — deb yozdi u. Vazir ta’kidlashicha, Britaniya hozir global iqtisodiy inqiroz fonida, shuningdek, Rossiya va Xitoyning xatti-harakatlari tufayli “ulkan sinovlar”ga duch kelmoqda.
Trass, bosh vazir bo‘lgan taqdirda, birinchi kundan soliqlarni qisqartirishga va’da berdi.
Trass Ukrainani faol ravishda qo‘llab-quvvatlaydi va Rossiya operatsiyasini qoralaydi. U boshlanganidan keyin vazir Britaniya Rossiya iqtisodiyotini vayron qilmagunicha tinchlanmasligini aytgandi. U mamlakatni “dunyo maydonidagi qochqin” deb atagandi.
TIV rahbari, shuningdek, Kiyevni qo‘llab-quvvatlash va Ukraina hududiy yon bossa, tezda tinchlikka erishilishini ko‘zda tutuvchi yondashuvni ilgari surishni to‘xtatish kerak, deb hisoblaydi.
“Oxir-oqibat gap ukrainaliklar nimani xohlayotgani haqida bormoqda. Prezident Vladimir Zelenskiy nima istashini aniq-ravshan aytdi. Biz uni bu borada qo‘llab-quvvatlashimiz kerak. G‘arb tomonidan ilgari surilayotgan tezlikda tinch yo‘l bilan tartibga solish yondashuvi o‘rinsiz. Biz Ukrainaning o‘z hududlaridan voz kechishini bildiruvchi tezkor tinchlikni o‘zimizga ep ko‘rmaymiz”, — degan u.
Shuningdek, Britaniya tashqi ishlar vazirining parlamentdagi o‘rinbosari Rexman Chishti ham hukmron Konservativ partiya va hukumat rahbari lavozimiga nomzodini qo‘ymoqchi.
Shu tariqa, ushbu lavozimga nomzodlar soni 11 kishiga yetdi. Bundan avval sobiq sog‘liqni saqlash vaziri Sajid Javid, sobiq tashqi ishlar vaziri Jeremi Xant, sobiq ta’lim vaziri Nadim Zaxaviy, sobiq moliya vaziri Rishi Sunak, savdo aloqalari bo‘yicha kichik vazir Penni Mordont bosh vazirlikka o‘z nomzodlarini qo‘ygandi.
Ayni paytda Buyuk Britaniya bosh vaziri vazifasini 7-iyul kuni iste’foga chiqishini e’lon qilgan Boris Jonson bajarmoqda. U hukumat a’zosi Kris Pincherning mast holatda janjal chiqargani va shilqimlik qilgani tufayli yuzaga kelgan shov-shuvdan keyin iste’fo berdi. Jonson Pincher avvalroq jinsiy shilqimliklarda ayblanganini bilgani, ammo shunga qaramay uni yuqori lavozimlarga tayinlagani ma’lum bo‘ldi.
Izoh (0)