Ukraina harbiy xizmatchilarining birinchi guruhi Buyuk Britaniyaga uchib keldi. Bu haqda Buyuk Britaniya mudofaa vazirligi rahbari Ben Uolles ma’lum qildi, deb yozmoqda The Independent.
Harbiylar uchun kurslar bir necha hafta davom etadi. Bularga qurol yig‘ish, jang maydonida birinchi tibbiy yordam ko‘rsatish, dala ko‘nikmalari, patrul taktikasi va qurolli mojaro qonunlarini o‘rgatish kiradi, dedi Uolles.
Buyuk Britaniya bosh vaziri Boris Jonson 17-iyun kuni Kiyevga tashrifi chog‘ida ukrainalik harbiylarni Ukrainadan tashqarida tayyorlash bo‘yicha yirik operatsiya boshlashni taklif qilgan edi. Britaniya hukumatiga ko‘ra, rasmiylar har 120 kunda 10 minggacha ukrainalik askarni tayyorlashni rejalashtirmoqda, bu esa “kuchlar muvozanatini tubdan o‘zgartirishi” mumkin.
Dasturda Britaniya harbiylari tajribasini inobatga olgan holda Ukraina qo‘shinlarini o‘qitish va tayyorlash ko‘zda tutilgan, bu esa Britaniya hukumatiga ko‘ra, Kiyevga “o‘z kuchini tiklash va qarshilikni kuchaytirish” imkonini beradi.
Avvalgi “Orbital” operatsiyasi davomida Buyuk Britaniya 2015-yildan beri 22 000 dan ortiq ukrainalik askarni tayyorlagan.
Izoh (0)