AQSHning Illinoys shtati, Chikago shahri chekkasidagi Xaylend-Park shaharchasida Mustaqillik kuniga bag‘ishlangan paradda otishma uyushtirishda gumonlanayotgan shaxsga ayblov e’lon qilindi, deb yozadi “RBK” shtat bosh prokurori Erik Raynxardtga tayanib.
21 yoshli Robert Krimo yettita band bo‘yicha ayblanmoqda. U bir umrlik qamoqqa hukm qilinishi mumkin. Prokuraturadan qayd etishlaricha, keyinroq Krimoga nisbatan qo‘shimcha ayblovlar ham ilgari suriladi.
Politsiya ma’lumotlariga ko‘ra, gumonlanuvchi hujum chog‘ida “kuchli vintovka”dan foydalangan. Bundan tashqari, politsiyachilar taxmin qilishicha, erkak otishmani “bir necha haftalar davomida” rejalashtirgan.
Xaylend-Parkdagi otishma 4-iyul kuni ertalab sodir bo‘ldi. Hujumchi binolardan birining tomida bo‘lgan. So‘nggi ma’lumotlarga ko‘ra, qurbonlar soni yetti kishiga yetgan, yana 24 kishi yaralangan. Besh kishi voqea joyida halok bo‘lgan, ikki kishi kasalxonada vafot etgan.
Gumonlanuvchi qochib ketgani tufayli, politsiya uni otishmadan keyin darhol tuta olmagan. Oxir-oqibat yigitni Shimoliy Chikago politsiyachilari ko‘rib qolgan va qo‘lga olgan.
AQSH prezidenti Jo Bayden voqeani izohlar ekan, “qurolli zo‘ravonlik epidemiyasi” qarshi kurashni tugatmoqchi emasligini aytib, mahalliy hukumatga yordam taklif qildi va federal huquq-tartibot organlaridan tekshiruvda yordam berishni so‘radi.
Izoh (0)