Ronaldu “Manchester Yunayted”ning ketma-ket 2-mashg‘ulotini o‘tkazib yuboradi. U klubga qachon qaytishi noma’lum

Krishtianu Ronaldu “Manchester Yunayted”ning 5-iyun kungi mashg‘ulotlarini o‘tkazib yuboradi.

The Athletic nashrining yozishicha, portugaliyalik mavsumoldi tayyorgarlikning ketma-ket ikkinchi kunini o‘tkazib yuborishi kutilmoqda.

Terma jamoada o‘ynagan futbolchilar klub bazasiga 4-iyul, dushanba kuni kelishi kerak edi, biroq Ronaldu oilaviy sharoiti tufayli belgilangan vaqtga yetib kelolmadi.

Krishtianuning jamoaga qachon qaytishi hozircha noma’lum. “Manchester Yunayted” 8-iyul kuni Tailand va Avstraliya bo‘ylab turga chiqadi.

“Manchester Yunayted” bosh murabbiyi Erik ten Hag kelasi mavsum uchun Ronalduni o‘z rejalariga kiritgan. Biroq futbolchi jamoaning YCHLda o‘ynamasligi va transfer bozoridagi sust harakatdan norozi, shu sababli u o‘ziga boshqa klub topish harakatida.

37 yoshli hujumchi Lissabonda bo‘lib turibdi. U Portugaliya terma jamoasi mashg‘ulotlar bazasiga tashrif buyurgan.

Ronaldu 2021/22-yilgi mavsum mankunianliklar safida barcha musobaqalarda 39 ta o‘yinda maydonga tushib, 24 ta gol va 3 ta golli uzatmani amalga oshirdi.