“Bavariya” va “Chelsi” “Yuventus” himoyachisi uchun kurash olib boradi

“Bavariya” “Yuventus” himoyachisi Matteys de Ligtga jiddiy qiziqish bildirmoqda.

Jurnalist Janluka di Marsioning yozishicha, 22 yoshli futbolchining transferi borasida ikkala klub o‘rtasida dastlabki aloqalar o‘rnatilgan.

Endi “Bavariya” “Yuventus”ning moliyaviy talablarini bajarishga qanchalik tayyorligini bilishi kerak. Shuningdek, Matteysning o‘zi myunxenliklar safiga qo‘shilishga roziligi ham aniq emas. Hozirda futbolchi “Chelsi”ga o‘tish haqida o‘ylamoqda. U Tomas Tuxel bilan birga ishlamoqchi.

London klubi himoyachiga qiziqishini saqlab qolgan. Antonio Ryudiger va Andreas Kristensen “Chelsi” safini tark etdi va “ko‘klar” yozda markaziy himoyachi sotib olishni maqsad qilgan. “Aristokratlar” de Ligtdan tashqari Milan Shkrinyar (“Inter”) va Kalidu Kulibali (“Napoli”) kabi futbolchilar uchun ham kurashga qo‘shilgan.

“Yuventus”ning transfer bozorida faolligi Matteysning sotuviga bog‘liq.

“Chelsi” himoyachi uchun 75—80 million yevro bermoqchi, “Yuventus” esa 90—100 million yevro talab qilmoqda.

Avvalroq “Manchester Yunayted” ham Matteys de Ligtga qiziqish bildirayotgani xabar qilingandi.

Niderlandiyalik 2021/22-yilgi mavsum turinliklar safida barcha musobaqalarda 42 ta o‘yinda ishtirok etib, 3 ta gol urishga muvaffaq bo‘lgan.