Ўзбекистонда 2022 йилнинг ўтган беш ойи мобайнида ишлаб чиқаришдаги 332 та бахтсиз ҳодиса оқибатида 96 нафар ходим вафот этган. Бу ҳақда Бандлик ва меҳнат муносабатлари вазирлигида бўлиб ўтган Жамоатчилик кенгаши йиғилишида маълум қилинган.
Ўзбекистон Касаба уюшмалари Федерацияси бўлими бошлиғи Нодира Ғойибназарованинг маълумот беришича, ишлаб чиқаришда рўй берган 332 та бахтсиз ҳодиса текширилган бўлиб, унда 366 нафар ходим шикастлангани, 6 нафар ходим енгил ва 264 нафар ишчи ходим оғир тан жароҳати олгани маълум бўлган.
«Минг афсуслар бўлсинки, ташкилотлар кўпинча бахтсиз ҳодиса рўй берганини яшириб, бахтсиз ҳодисадан жабрланган ёки вафот этган ходимига компенсация тўлашдан қочади. Тўғри, уларнинг иши ташкилот даромадини ошириш, камайтириш эмас. Лекин бунга кафолатланган меҳнат шароитини яратиб бериб, ходимининг самарали меҳнати ортидан эришиш керак», — дейди Нодира Ғойибназарова.
Маълумот берилишича, Давлат меҳнат инспекциясига 2022 йилнинг ўтган беш ойи мобайнида меҳнат муносабатларига оид 9400 дан ортиқ мурожаат келиб тушган.
«Дунё бўйича таҳлил қилинганида ҳар куни 5-6 миллион киши уйидан ишга деб чиқиб кетяпти, аммо қайтиб келмаяпти. Нимага? Сабаби кафолатланган иш шароитида меҳнат қилмагани боис, ишлаб чиқариш жараёнида содир бўлаётган бахтсиз ҳодисалар қурбонига айланмоқда. Бу жудаям даҳшат. Бу ҳолат Ўзбекистонда ҳам бор, йўқ эмас. Шунинг учун биз ҳар доим махсус кийим бош билан меҳнат қилувчи барча ташкилот ва корхоналар масъулларига сертификатланган махсус кийим-бош олиб, ишчилари учун хавфсиз ва кафолатланган меҳнат шароитини яратиб беришларини сўраб келамиз», — дейди Нодира Ғойибназарова.
Қайд этилишича, 2021 йилда ишлаб чиқаришда содир бўлган 810 та бахтсиз ҳодиса ўрганилганда ҳодиса оқибатида 907 нафар ходим тан жароҳати олгани, 238 нафар ходим вафот этгани, 37 нафар ходим енгил, 632 нафар ходим эса оғир тан жароҳати олгани маълум бўлган.
Изоҳ (0)