Qoraqalpog‘istonning Nukus shahrida noqonuniy namoyishlarda qatnashganlikda gumonlangan fuqarolar qo‘lga olingan. Bu haqda AOKAda Qoraqalpog‘istondagi favqulodda holat vaqtida amalga oshirilgan ishlar yuzasidan o‘tkazilgan brifingda ma’lum qilindi.
Milliy gvardiya axborot xizmati rahbari Davron Jumanazarovning ma’lum qilishicha, 1—2 iyul kunlari tartibsizliklarda qatnashgani uchun voqea joylarida ushlangan 516 nafar fuqaro ichki ishlar boshqarmasiga topshirilgan. Ular bilan surishtiruv ishlari olib borilmoqda. Surishtiruvlar natijasida ayrim fuqarolar ma’muriy choralar qo‘llanilganidan so‘ng qo‘yib yuborilgan.
Favqulodda holat e’lon qilinganidan so‘ng 4-iyulga o‘tar kechasi komendantlik tartibini buzgani uchun 110 nafar fuqaro ko‘chalarda bemaqsad yurgani uchun ushlanib, ichki ishlar idoralariga topshirilgan. 12 ta avtotransport vositasi jarima maydonchasiga joylashtirildi. Xususan, Nukus shahrida komendantlik rejimiga rioya qilmagan 58 nafar shaxs ushlangan. Shundan 28 nafariga tegishli moddalar bilan ma’muriy bayonnoma rasmiylashtirilgan, qolganlari bilan profilaktika suhbat o‘tkazilib, 7:00 dan keyin qo‘yib yuborilgan.
Izoh (0)