Shri-Lankada iste’mol narxlari iyun oyida o‘tgan yilga nisbatan 54,6 foizga oshdi. Bu haqda mamlakat Markaziy banki xabar bermoqda.
Bu shunchaki yangi rekord emas — inflyatsiya 50 foizdan oshdi, shundan boshlab iqtisodchilar narxlarning oshishini giperinflyatsiya deb hisoblashadi.
Haqiqiy ko‘rsatkich Bloomberg tomonidan so‘ralgan tahlilchilar prognozidan ancha yuqori bo‘lib chiqdi, ular oy oxiriga qadar Shri-Lankada inflyatsiya 43,7 foizgacha ko‘tarilishini kutgan edi.
Transport va oziq-ovqat narxlari eng ko‘p ko‘tarilmoqda, chunki orol davlatining yoqilg‘i sotib olishga puli juda kam yoki qolmagan.
Buning oqibatida iyun oyida oziq-ovqat va alkogolsiz ichimliklar narxlari o‘tgan yilning shu davriga nisbatan 80 foizga, transport narxlari esa 128 foizga oshdi.
Shri-Lanka 1948-yilda mustaqillikka erishganidan beri eng og‘ir inqirozga yuz tutmoqda. 12 aprelda esa mamlakat tashqi majburiyatlarni bajara olmadi, kredit shartnomalari va obligatsiyalar bo‘yicha barcha to‘lovlarni to‘xtatdi.
Dunyo tarixida taxminan 25 dan ziyod giperinflyatsiya holati sodir bo‘lgan. Eng mashhurlaridan biri 1992-yil aprelda 1994-yil yanvargacha Yugoslaviyada qayd etilgan.
Avvalroq Shri-Lanka Osiyo-Tinch okeani mintaqasidagi XXI asrda defolt bo‘lgan ilk davlatga aylangan edi.
Izoh (0)