Samyuel Eto’O Ispaniyada 22 oylik qamoq jazosiga hukm qilindi
“Inter” va “Barselona” sobiq hujumchisi Samyuel Eto’O Ispaniyada to‘p surgan vaqtlarida soliq to‘lashdan bo‘yin tovlagani uchun 22 oylik shartli qamoq jazosiga hukm qilindi, deya xabar beradi Diario Sport.
41 yoshli kamerunlik o‘z aybiga iqror bo‘ldi, hukm Barselona sudi tomonidan qabul qilingan.
Futbolchining sobiq vakili Xose Masalles ham bir yillik shartli jazoga hukm qilindi. Eto’O allaqachon sobiq agentini o‘z aktivlarini e’tiborsiz boshqargani uchun sudga bergan.
Shartli jazodan tashqari Samyuel jami miqdori 1 810 310 yevrolik to‘rtta jarima ham to‘lashi kerak bo‘ladi. Mesalles esa umumiy qiymati 905 155 yevrolik jarima to‘laydi.
Sud tomonidan ko‘rib chiqilayotgan voqealar 2006-yildan 2009-yil oralig‘ida bo‘lib o‘tgan, o‘shanda kamerunlik futbolchi o‘z imij huquqini “Barselona” va Puma’ga topshirishdan katta daromad olgan. Eto’O o‘zining soliq deklaratsiyasida daromad haqida xabar bermagan.
41 yoshli Eto’O 2021-yil 11-dekabrdan buyon Kamerun futbol federatsiyasi prezidenti lavozimida faoliyat olib bormoqda.
Samyuel Eto’O 3 karra Chempionlar Ligasi g‘olibi hisoblanadi, shuningdek, 3 marta Ispaniya va bir marta Italiya chempionatida zafar quchgan.
