“Haj-2022” mavsumi uchun 1 nafar ziyoratchiga to‘lov miqdori oshirilib, 62 million 900 ming so‘m etib belgilangandi. O‘zbekiston musulmonlari idorasi ushbu to‘lovga nimalar kirishi haqida ma’lumot berdi.
Idora tomonidan taqdim etilgan ma’lumotda birinchi navbatda Saudiya hukumati tomonidan haj safari narxiga ta’sir qiluvchi qo‘shimcha soliq va majburiy to‘lovlar joriy qilingani, shuningdek, kommunal, transport, elektr-energiya va boshqa xizmatlar uchun to‘lovlar miqdori bir necha baravar (30-40 foiz) oshgani bildirib o‘tilgan.
Shuningdekdek, Haj amallarini tashkil etuvchi muassasalarning xizmatlariga 2022-yilda yangi majburiy to‘lovlar joriy etilgani, shu sababli dunyo mamlakatlari uchun haj xizmatlari narxi o‘rtacha 40-45 foizga ko‘tarilgani qayd etilgan.
Ma’lum qilinishicha, O‘zbekiston tomoni Saudiya bilan olib borilgan uzoq muzokaralar natijasida ziyoratchilar uchun iqtisodiy paket narxiga lyuks darajasidagi xizmat ko‘rsatishga erishdi va to‘lov uchun o‘rta narxni belgiladi. Ayrim davlatlarda eng qimmat paketlar narxi 25 ming dollargacha etib belgilangan.
O‘zbekistonlik ziyoratchilar joriy mavsumda birinchi marta Madina shahrida “Masjidi Nabaviy”dan 100 metr uzoqlikda joylashgan 5 yulduzli “Zam-zam Pullman” va “Kraun Plaza” mehmonxonalarida istiqomat qiladi. Makka shahrida esa “Abroj al-Hidoya” mehmonxonasida yashaydi.
Ta’kidlanishicha, Ushbu mehmonxonalar yuqori sig‘imli ekani, muqaddas qadamjolarga yaqinligi bilan alohida ajralib turadi. Masalan, Makka shahridagi “Abroj al-Hidoya” mehmonxonasi barcha hojilarimizni bir vaqtda joylashtirish imkoniyatiga ega.
Bundan tashqari, safar davomiyligi ayrim qo‘shni davlatlar ziyoratchilari singari 14-17-20 kun emas, balki 26 kunni tashkil etadi. Bu ham, tabiiy ravishda, narxlarga o‘z ta’sirini ko‘rsatadi.
Joriy haj mavsumida Saudiya hukumatining qaroriga asosan, barcha to‘lovlar shirkatlar orqali emas, balki Saudiya Arabistoni Haj va umra vazirligining “Haj elektron portali” orqali belgilangan tartibda amalga oshirildi. Ushbu portalda har bir davlat uchun alohida hisob raqami mavjud bo‘lib, barcha xizmatlar: mehmonxona, transport, mashoir va hokazolar uchun shu yerning o‘zida inson omilisiz shaffof holda amalga oshiriladi.
Mashoir (Mino, Arafot, Muzdalifa) xizmatlari ham sezilarli darajada ko‘tarildi. Shunday bo‘lsada, iqtisodiy paket olindi va oldinlari taqdim etilmagan xizmatlar ko‘rsatishga erishildi.
“Jumladan, avvallari ziyoratchilar Mino vodiysida gilamda yotgan bo‘lsalar, bu yil har bir hoji uchun maxsus yoyma to‘shaklar (matraslar) ajratiladi. Shuningdek, boshqa davlatlarda 3 mahal issiq ovqat berilmasada, yurtimiz ziyoratchilari uchun Mino va Arafotda ham 3 mahal issiq ovqatlar tortiq etiladi. Qolaversa, 24 soat davomida bepul tibbiy xizmat ko‘rsatiladi”, — deyiladi idora bergan izohda.
Musulmonlari idorasi bergan ma’lumotga ko‘ra, haj uchun to‘langan mablag‘ ichiga quyidagiar kiradi:
- Haj vizasi;
- Aviabilet;
- Shaharlararo (Madina-Makka-Jidda) transport xizmati;
- Madina shahrida “Zam-zam Pullman” va “Kraun Plaza” mehmonxonasi;
- Madina shahrida Uhud tog‘i, Qubo va ikki qiblali masjidlarga ziyorat;
- Makka shahrida “Abroj al-Hidoya” mehmonxonasi;
- Mino, Arofat va Muzdalifa vodiylaridagi barcha xizmatlar;
- 24 soat tibbiy xizmat;
- Hojilarning tibbiy sug‘urtasi;
- 24 soat transport xizmati;
- 3 mahal isiq ovqat: nonushta, tushlik va kechki ovqat;
- Haj qo‘llanmasi;
- Davlat ramzlari tushirilgan nimcha va sumka;
- “Zamzam” suvi (5 litr);
- Respublikaning 7 ta hududidan kuzatish va kutib olish;
- Madinai munavvaraga to‘g‘ridan-to‘g‘ri aviareys;
- Qurbonlik.
Haj safarga jo‘nash aviaqatnovlari 18-iyun kuni Uzbekistan Airways samolyotlari orqali amalga oshiriladi va 30-iyunga qadar davom etadi. Ziyoratchilarni Toshkent, Namangan, Samarqand, Qarshi, Buxoro, Urganch va Nukus shaharlaridan tashish reja qilingan.
Izoh (0)