O‘zbekistonda shaftoli narxining keskin arzonlashish sabablari e’lon qilindi
O‘zbekiston bozorlarida tukli va tuksiz shaftoli narxining uch baravar arzonlashdi. Bu haqda EastFruit xabar berdi.
Tukli va tuksiz shaftolining birinchi ulgurji partiyalari O‘zbekiston bozorlarida may oyining oxirida paydo bo‘lgan, so‘nggi ikki haftada esa bu mahsulotning o‘rtacha ulgurji narxi 3 barobar arzonlashgan. Joriy narxlar o‘tgan yilgi narxlardan uch baravar arzon.
2022-yil 27-maydan 10-iyungacha shaftolining o‘rtacha ulgurji narxi 60 ming so‘mdan 20 000 so‘mgacha, ya’ni 3 barobar pasaygan.
2022-yil 10-iyun holatiga ko‘ra, ushbu mahsulotlarning o‘rtacha ulgurji narxlari 2021-yilning shu sanasiga nisbatan 33 foiz past va 2020-yilning xuddi shu sanasida qayd etilgan narxlar bilan taxminan bir xil.
Biroq bu yil shaftolining ommaviy yig‘im-terim mavsumi boshida narxlarning pasayish darajasi o‘tgan yilga nisbatan ancha sezilarli bo‘ldi.
Bozor ishtirokchilari va ushbu mahsulot ishlab chiqaruvchilarining fikricha, narxlarning arzonlashi ertapishar navlarning yuqori hosildorligi va o‘rtapishar navlar hosili yaxshi bo‘lishi kutilayotgani hamda buning natijasida ichki bozorda taklif hajmining ortib borishi bilan bog‘liq.
Tukli va tuksiz shaftoli meva segmentida O‘zbekiston eksport daromadining muhim manbai bo‘lib, uning bu borada egallaydigan o‘rnini faqat gilos bilan qiyoslash mumkin. Ushbu ikkita meva uzumdan keyingi ikkinchi o‘rinda turadi.
Avvalroq O‘zbekiston 2 oyda 114 mln dollarlik meva va sabzavotlar eksport qilgani haqida xabar berilgan edi.
