O‘zbekistonda ochiq ko‘rsatilishi kerak bo‘lgan ma’lumotlarni e’lon qilmagan mansabdorlar jarimaga tortiladi

Oliy Majlis Senatining yigirma yettinchi yalpi majlisida “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish, shuningdek ayrim qonun hujjatlarini o‘z kuchini yo‘qotgan deb topish to‘g‘risida”gi qonun ko‘rib chiqildi. Bu haqda parlament yuqori palatasi matbuot xizmati xabar berdi.

Ushbu qonun bilan davlat hokimiyati va boshqaruvi organlari tomonidan ochiqlik to‘g‘risidagi qonunchilikni buzganlik uchun ma’muriy javobgarlik belgilanmoqda.

Xususan, Ochiq ma’lumotlar sifatida joylashtiriladigan, ijtimoiy ahamiyatga molik bo‘lgan ma’lumotlar ro‘yxatiga kiritilgan ma’lumotlarni e’lon qilmaganlik yoki to‘liq e’lon qilmaganlik, e’lon qilish muddatlariga va tartibiga rioya etmaganlik yoki ma’lumotlarni buzib ko‘rsatganlik uchun mansabdor shaxslar bazaviy hisoblash miqdorining 3 baravaridan 5 baravarigacha (1,5 million so‘mgacha), agar ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, 5 baravaridan 10 baravarigacha (3 million so‘mgacha) miqdorda ma’muriy jarimaga tortilishi nazarda tutilmoqda.

“Gazeta.uz”ning yozishicha, Korrupsiyaga qarshi kurashish agentligi bunday huquqbuzarliklar yuzasidan ma’muriy bayonnomalar tuzib, ko‘rib chiqish uchun sudga yuborishi mumkin.

Senat raisi Tanzila Norboyeva buni davlat idoralarining jamiyat uchun ochiqligi va shaffofligi yo‘lidagi “yana bir muhim qadam” deb atagan.

Iyun oyidan boshlab davlat organlari o‘z faoliyati, jumladan, xaridlar, xizmat safarlari, xizmat avtomashinalari va uy-joylar bo‘yicha 33 turdagi ochiq ma’lumotlar to‘plamini e’lon qilib borishi shart.

Bundan tashqari, qonun bilan debitorlik va kreditorlik qarzi muddatlarini o‘tkazib yuborish hamda korxonalarning hisobvaraqlarida tegishli mablag‘lar bo‘lgan holda to‘lovlarni amalga oshirishning belgilangan muddatlarini buzganlik, shu bilan birga, shartnoma majburiyatlarini bajarmaslik yoki lozim darajada bajarmaslik oqibatida xo‘jalik yurituvchi subyektlarga mulkiy zarar yetkazish kabi huquqbuzarlik uchun ma’muriy javobgarlik bekor bo‘lmoqda.

Shuningdek, qonun hujjatlariga nodavlat sud-ekspertlarining surishtiruv, dastlabki tergov va sud ish yurituvidagi ishtiroki hamda ular vakolatini nazarda tutuvchi yangi normalar kiritilmoqda.

Shu bilan birga, advokat kasbiy faoliyatini amalga oshirish chog‘ida yana bir qancha huquqlarga ega bo‘lyapti. Jumladan, iqtisodiy, fuqarolik va ma’muriy ish yuritilayotganda sudga qadar tayyorgarlik chog‘ida hamda sud jarayonida ishonch bildiruvchi shaxsning roziligi bilan davlat va nodavlat sud-ekspertiza tashkilotlari tomonidan shartnoma asosida ekspertiza o‘tkazilishini so‘rash, shuningdek, ekspertiza xulosasi ish materiallariga qo‘shib qo‘yilishini va sud tomonidan ushbu xulosa ishdagi mavjud dalillar bilan birgalikda baholanishini talab qilish huquqi shular jumlasidandir.

Bundan tashqari, fuqarolik, ma’muriy va iqtisodiy sud ishlarini yuritishda ekspert sifatida nodavlat sud-ekspertiza tashkilotining eksperti ham ishtirok etishi mumkinligi nazarda tutilmoqda.

Qonun senatorlar tomonidan ma’qullangan.