Antigua va Barbuda O‘zbekiston bilan diplomatik munosabatlar o‘rnatgan 141-mamlakat bo‘ldi. Bu haqda “Dunyo” agentligi xabar berdi.
13-iyun kuni Nyu-York shahrida O‘zbekiston bilan Antigua va Barbuda o‘rtasida diplomatik munosabatlarni o‘rnatish to‘g‘risidagi Qo‘shma kommyunike imzolangan.
Ikki mamlakat hukumatlari nomidan hujjat O‘zbekistonning BMTdagi doimiy vakili, elchi Baxtiyor Ibragimov hamda Antigua va Barbudaning BMTdagi doimiy vakili Alfonso Vebson tomonidan imzolangan.
Tomonlar xalqaro tashkilotlar, jumladan, BMT va uning ixtisoslashgan muassasalari doirasida qo‘shma hamkorlikni mustahkamlashdan manfaatdor ekanliklarini tasdiqlagan. Hamkorlikning o‘zaro manfaatli yo‘nalishlarini izlash uchun ikki tomonlama aloqalarni davom ettirish bo‘yicha kelishuvga erishilgan.
Ta’kidlanishicha, hujjatning imzolanishi O‘zbekistonning Karib havzasi davlatlari bilan o‘zaro hamkorligini kengaytirish yo‘lidagi muhim qadam hisoblanadi.
Eslatib o‘tamiz, 2021-yilning mayida Dominika O‘zbekiston diplomatik aloqalar o‘rnatgan 137-, Panama 138-davlat bo‘lgandi. 2022-yil 9-mart kuni mamlakatimiz Sent-Kits va Nevis Federatsiyasi bilan diplomatik aloqalar o‘rnatgan edi. 10-may kuni Sent-Vinsent va Grenadin orollari O‘zbekiston bilan diplomatiya munosabatlari o‘rnatgan 140-mamlakat bo‘lgandi.
Izoh (0)