Qashqadaryoda 2 nafar o‘quvchi qotillik, 2 nafar o‘qituvchi esa qotillik va nomusga tegish jinoyatini sodir etgani ma’lum bo‘ldi

Qashqadaryo viloyatida 2021/2022-o‘quv yilida 2 nafar o‘quvchi qotillik jinoyatiga, 2 nafar o‘qituvchi esa qotillik va nomusga tegish jinoyatiga qo‘lga urgani ma’lum bo‘ldi. Bu haqda kecha, 13-iyun kuni viloyat hokimligida bo‘lib o‘tgan hokimlik soatida ma’lum qilindi deya xabar berdi hokimlik axborot xizmati.

Ma’lum bo‘lishicha, viloyatdagi mavjud maktablarda mas’ullarning e’tiborsizligi bois ta’lim sifati pasayishi, o‘quvchilar davomati va xulq-atvori nazorat qilinmasligi yuzaga kelgan.

“Oqibatida maktab o‘quvchilari tomonidan sodir etilgan huquqbuzarliklar miqdori o‘tgan yilning mos davriga nisbatan 16 taga ya’ni 2021-yilda 27 ta sodir etilgan bo‘lsa, 2022-yilda 43 taga yetgan. Bu mazkur masaladagi ko‘rsatkich 60 foizga oshganligini ko‘rsatmoqda. Tahlillarga ko‘ra, jinoyatlarning 2 tasi qotillik bo‘lib, biri Qarshi shahrida, ikkinchisi Dehqonobod tumanida sodir etilgan va o‘lim bilan yakun topgan. Jumladan, Qarshi shahar 27-sonli o‘rta maktabning 11-sinf o‘quvchisi Qarshi shahar ‘Komilon’ MFY Buloq ko‘chasi 35-uyda yashagan fuqaroni qasddan o‘ldirib, o‘zining jinoiy qilmishlarini yashirish maqsadida, marhumning turmush o‘rtog‘i va onasining ham bosh qismiga urgan, so‘ngra uning Nexia-3 rusumli avtomashinasini olib voqea joyidan yashiringan”, — degan viloyat hokimi.

Yig‘ilishda ta’kidlanishicha, viloyat Xalq ta’limi boshqarmasi tomonidan o‘quvchilari tomonidan jinoyat sodir etilgan maktab direktorlari, ma’naviy-ma’rifiy ishlar bo‘yicha o‘rinbosarlari, sinf rahbarlari yoki xalq ta’limi bo‘limi mudirlarining shaxsiy mas’uliyati va javobgarligi masalasi ko‘tarilmayapti.

“Eng achinarlisi, biz maktab o‘quvchilari orasida huquqbuzarliklarning oldini olish haqida gapirayotgan bir vaqtda, maktab o‘qituvchilari tomonidan jinoyat sodir etganligini nima deb izohlashimiz mumkin? 2022-yilning besh oyida 29 nafar o‘qituvchi tomonidan jinoyatlar sodir etilgan bo‘lib, shundan Shahrisabz shahrida sodir etilgani qotillik jinoyati hisoblanadi”, — deydi viloyat hokimi Murodjon Azimov.

Viloyat rahbari shuningdek, Qarshi shahridagi 20-maktabda 2 ta holatda o‘qituvchilar tomonidan o‘rtacha og‘ir tan jarohati yetkazish bilan bog‘liq, 2 ta yengil tan jarohati yetkazish bilan bog‘liq jinoyat sodir etilganini aytgan.

“Qamashi tumanida o‘qituvchilar tomonidan bitta nomusga tegish va bitta bezorilik, Chiroqchida esa ikkita o‘g‘rilik jinoyati sodir etilgan”, — deydi viloyat rahbari.