Kollejdan haydalgan, bosh rol uchun 4 oy navbatchilik qilgan: Salmon Xon kinodagi karyerasini qanday boshlagan?

Ba’zilar uchun Salmon Xon — bu shunchaki bir chashka qahva ustida g‘iybat qilish mumkin bo‘lgan yulduzlardan biri. Boshqalar uchun u itoatkor o‘g‘il, o‘z oilasini yaxshi ko‘radigan aka va amaki. Yana kimlar uchundir ajoyib do‘st, metsenat va murabbiy. Filmlari muvaffaqiyatidan zavqlanadigan va kambag‘allarga, bolalarga yordam beradigan aktyor. Bollywoodtime nashri Salmon Xonning kinodagi ilk qadamlari, Bollivudga qanday kirib kelgani va karyerasi qanday boshlangani haqida ma’lumot beradi. Ishoning, bu juda qiziq voqea.

Kollejdan haydalgandan so‘ng, Salmon Xon modellik bilan shug‘ullanishga va filmlarda karyerasini boshlashga qaror qiladi (shubhasiz, otasi Salim Xonning muvaffaqiyatli karyerasi ta’sir qilgan, u taniqli ssenariy muallifi bo‘lgan va bir nechta super hitlarni yozgan, masalan, “Devor”, “Qasos va qonun”, “Mafiya boshlig‘i Don” kabi). Ammo 1988-yilda kino sohasiga qadam qo‘yganida, otasi uni umuman qo‘llab-quvvatlamaydi.

Amakisi Nosir Husayn yordamida kinoga kirib kelgan Amir Xon, otasi Rajendra Kumar qo‘llashi tufayli “Sevgi tarixi” filmida rol o‘ynagan Kumar Gaurav yoki otasi Sunil Datt o‘g‘li uchun qo‘lidan kelganini qilgan Sanjay Datt kabi mashhur bolalardan farqli o‘laroq Salmon Xonning otasi filmda rol olish uchun uning ismidan foydalanishni qat’iyan man qiladi. Salmon otasining yordamisiz qoladi va o‘zining tan olishicha, “Oshiq bo‘ldim” filmining katta muvaffaqiyatidan keyin ham u bir necha oy ishsiz uyda o‘tiradi.

Aytish mumkinki, Salmon Xonning aktyor sifatida ochilishiga reklama olamida juda taniqli shaxs Kailash Surendranath sababchi bo‘lgan. U buni  shunday eslaydi: “Bir kuni elita klubining basseynlaridan birida do‘stimning qizi Arti chiroyli yigitni ko‘rib qoladi — undan ko‘z uzib bo‘lmasdi. Salmon 15 yildan beri suzish bilan shug‘ullangani tufayli o‘zini suvdagi baliqdek his qilardi. U bir sho‘ng‘iganda, hovuzning narigi tomonidan chiqardi.

Arti buni ko‘rgach, Andaman orollarida reklama suratga olayotganim esiga tushadi. Bizda hamma narsa tayyor edi. Men allaqachon Sunil Niskolni (aktyor Navin Niskolning ukasi) va Vanessa ismli modelni tanlab qo‘ygandim. Esimda Arti ko‘zlari yonib yonimga yugurib keldi va suv ostida delfindek suzayotgan epchil suzuvchini ko‘rganini ayta boshladi. Men u bilan tanishishga rozi bo‘ldim.

Arti uni ofisga olib kelganida “Xudoyim, bu axir yosh bola-ku!” dedim. “Yo‘q, yo‘q, shoshmang” deb xitob qildi Arti. Salmon ko‘ylagini yechganda, uning mushakdor chiniqqan tanasi meni hayratda qoldirdi. Rostini aytsam, o‘sha paytda boshqa ilojim yo‘q edi, shuning uchun mayli, harakat qilib ko‘rsin, dedim.

Salmon barcha aktyorlarimiz baland baland bo‘yli ekanini ko‘rganida umidi puchga chiqdi. U reklamada suratga tushishga mos emasligini, uyga ketishini aytdi. Ammo Arti uni aeroportga kiraverishda to‘xtatib, biz bilan birga borishga ko‘ndirdi. “Ahmoqlik qilma, biz bilan yur”, dedi uning qo‘lidan ushlab qoldi.

Salmon Xon baland bo‘yli bo‘lmasa-da, lekin ota-onasidan faqat eng yaxshi narsalarni olgan istarali yigit edi. U aktyorlik mahoratiga ega bo‘lmasa-da, lekin aktyor bo‘lishga qaror qilgandi. U boshidanoq amakisi Naim Xon (Salimning akasi) kabi bo‘lishga intilib, sport zalida mashq qila boshladi. Naim Salmon tug‘ilgan Indor shahrida yashagan. U har ta’tilni otasining oilasi bilan o‘tkazardi.

Qarindoshlari va do‘stlarining aytishicha, Salmon bolaligida baquvvat va qaysar bo‘lgan. Bu uchqun uning dastlabki rollarida ham seziladi. U o‘z filmlariga payqamaslikning iloji bo‘lmagan yangilik va joziba olib keldi. Salmon Bollivudda birinchi marta 1988-yilda “Rafiqa” (Biwi Xo To Aisi) filmida ishtirok etdi, ammo uning roli e’tibor tortadigan darajada emasdi.

Keyingi yili u debyutant rejissor Bhagyashri bilan “Oshiq bo‘ldim” melodramasi uchun kastingdan o‘tdi va ikkalasining mahorati tufayli filmni katta muvaffaqiyatga erishdi.

“Oshiq bo‘ldim” filmidagi Premning qizil rangli sport mashinasi va charm kurtkasi o‘sha davr yoshlarining orzusi edi, Hindiston ham asta-sekinlik bilan G‘arbga ochila boshlayotgandi.

O‘sha paytlarda rejissor Suraj Barjatiyaning o‘zi ham debyutant bo‘lib, birinchi filmi uchun yangi chehra izlayotgandi. Salmon debyut roli omadsiz chiqqani uchun uning nazarida yangi aktyor emas edi.

“Oshiq bo‘ldim” filmida rol o‘ynash Salmon uchun oson bo‘lmagan. U rejissorni uni ishontirishi kerak edi, chunki Barjatya allaqachon Prem roliga boshqa aktyorni ko‘z ostiga qo‘ygandi. Salmon ikki marta kastingdan o‘tadi, shartnoma imzolamaguncha ijodkorning ofisida 4 oy navbatchilik qildi.

Keyinchalik Salmon ko‘plab filmlarda rol o‘ynadi, unda rejissorlar uning o‘jar va oqko‘ngil Prem obrazidan foydalanishdi. Albatta, Salmon Xonning aktyorlik mahorati yoki filmlarining sifati haqida bahslashish mumkin, lekin ular hind kinosining so‘nggi o‘ttiz yilligini shakllantirgan va hatto butun dunyo bo‘ylab namoyish etilgan filmlardir. Faoliyatining boshida aktyor eng yaxshi romantik qahramon, qo‘shni bola va ideal oshiq edi (aslida juda uzoq vaqt). Keyinchalik u jangari filmlar qahramoniga aylandi va bunday rollari haligacha sevib tomosha qilinadi.

Salmon filmlarda tez-tez ko‘rina boshlagach, ommaviy axborot vositalari bilan juda yomon munosabatda bo‘ldi. Aktyor biroz g‘alati va mas’uliyatsiz harakati bilan hammaning e’tibor markazida bo‘ldi. Uning ekrandagi va ekrandan tashqaridagi shaxsiyati o‘rtasida katta farq bor edi. Xon shaxsiy hayotini jamiyatdan yashirmagan kam sonli yulduzlardan biri edi. Ko‘p o‘tmay Bollivudda “Yomon bola” dunyoga keldi, lekin bu haqda keyingi safar gaplashamiz.