Gollivudning mashhur aktyorlari haqida hamkasblari nima deydi?

Ilgari yulduzlar haqida ko‘p narsa bilmas edik, endi esa sevimli aktyorlarimizning, go‘yo ular bizning eng yaqin do‘stlarimizdek, kundalik hayotini kuzatish imkoniga ega bo‘ldik. Ularni ommaviy axborot vositalarida va ijtimoiy tarmoqlarda kuzatamiz. Biroq ularning bir jihati ko‘pchilik uchun haliyam yopiq: bu ish jarayoni bilan bog‘liq hamma narsa.

Rayan Gosling

“La La Lend” yulduzi Rayan Gosling har doim suratga olish maydonchasidagi odamlarga, ayniqsa, yosh hamkasblariga e’tiborli bo‘lishga harakat qiladi. Gosling “Ajoyib yigitlar” filmida ishlayotganda bir nechta yosh aktrisalar bilan kastingda qatnashadi. U har bir ishtirokchining tarjimayi holini sinchkovlik bilan o‘rganib chiqib, yaxshi tayyorgarlik ko‘radi.

Film rejissori Sheyn Blek shunday deydi: “Bu ajoyib edi. U qizlarning har biri haqida hamma narsani bilardi. Ular qaysi filmlarda suratga tushgani va hayotlari haqida ma’lumotga ega edi. U haqiqatan ham bolalar bilan tanishish uchun vaqt ajratdi. Bu juda ajoyib edi”.

Dueyn (Qoya) Jonson

Dueyn Jonsonning suratga olish maydonchasida o‘zida bor narsasini berishi va o‘z ustida ishlashi hamkasblarini hayratda qoldiradi hamda ilhomlantiradi. “Uning fitnes rejimi va tanasiga qanday g‘amxo‘rlik qilishi meni hayratda qoldiradi. Bu, albatta, meni ilhomlantiradi”, — deydi “Forsaj: Hobbs va Shou” filmida Qoya bilan birga ishlagan Idris Elba.

Klaudiya Shiffer

Mish-mishlarga ko‘ra, taniqli model va aktrisa Klaudiya Shiffer bilan ishlash qiyin. U xodimlar bilan bevosita muloqot qilmaslikni afzal ko‘radi.

“Klaudiya Shifferning juda g‘alati odati bor. Unga biror nima desangiz, u o‘z yordamchisiga javob beradi, go‘yo siz xonada yo‘qdek. Keyin esa yordamchi sizga uning gapini takrorlaydi”, — dedi model tashrif buyurgan muassasa xodimlaridan biri.

Tom Xenks

“Forrest Gamp” va “Yashil mil” kabi mashhur filmlarda bosh rollarni o‘ynagan Tom Xenksni ko‘pchilik juda yaxshi inson sifatida gapiradi. Xenks bilan “Sfera” filmida birga ishlagan Emma Uotson shunday deydi: “Men Tom Xenks barcha maqtagandek emasligiga ishonchim komil edi. U hamma aytganidek iltifotli bo‘lishi mumkin emas. Ammo u aynan shunday edi”.

“U juda saxiy va muloqot qilish oson. Unda siz ko‘rmoqchi bo‘lgan barcha fazilatlar mavjud. Bu haqda chin dildan ayta olganimdan juda xursandman, chunki agar Tom bo‘lmaganida, qattiq xafa bo‘lardim”, — deya qo‘shimcha qiladi u.

Jorj Kluni

Tajribali aktyor Jorj Kluni o‘zini yangi soha — rejissorlikda sinab ko‘rishga qaror qildi. Uning “Nafis bar” filmida bosh rolni ijro etgan yosh aktyor Tay Sheridanning aytishicha, Kluni yordamini ayamaydigan rejissorlardan biri. “U odamlarga o‘zlarini qulay his qilishlariga yordam beradi”, — deydi Sheridan.

“Kluni hamma narsani tushunadi. U xuddi birgalikda rol ijro etayotganga o‘xshaydi va bu juda qiziqarli. O‘ylaymanki, munosabatlarimizda boshqa rejissorlar bilan bo‘lganidan farqli dinamika bor edi. Bu menga juda yoqdi”, — deydi u.

Rassell Krou

Rassell Krou o‘zi bilan ishlash qiyinligi bilan tanilgan aktyor. Ko‘pincha bu uning ishiga bo‘lgan ishtiyoqi bilan bog‘liq. “Rassel minglab savollar beradi. Biz 6 hafta davomida birga ishladik va shu 6 haftada u ssenariyning har bir satrini o‘qib chiqdi. U har bir tafsilotni shubha ostiga qo‘yadi”, — deydi “Los Anjeles sirlari ortidan” filmida aktyor bilan ishlagan rejissor Kertis Xanson.

Kichik Robert Dauni

Kichik Robert Dauni nafaqat ekranda eng taniqli superqahramonlardan biri — Temir odamni gavdalantiradi, balki Marvel olami kinoi jodkorlarini ham qo‘llab-quvvatlaydi.

“U juda zo‘r yigit, juda iste’dodli, tajribali va hammaga yordam beradi. U doim yonimda bo‘ldi, uning yordamini his qilib turdim. U hammani bir jamoaga yig‘a olishni biladi va barchaga yetarlicha e’tibor qaratilishiga harakat qiladi”, — deydi franshizada Kapitan Amerika rolida o‘ynagan Kris Evans.

Uilliam Defo

Robert Pattinson afsonaviy aktyor bilan “Mayoq” dramasining suratga olish maydonida birga ishladi. Pattinson Uilliam Defoning energiyasidan ilhomlangan va hatto biroz qo‘rqib ham ketgan: “Suratga olishni boshlashdan oldin taxminan bir hafta mashq qildik. Uilliam juda ko‘p energiyaga ega. Bu xuddi 6 yoshli bola bilan ishlashga o‘xshaydi. U umuman charchamaydi”.

“Avvaliga biroz qo‘rqdim. Biz butun filmni boshdan oyoq repetitsiya qildik. Tugatganimizdan so‘ng, u shunday dedi: “Qaytadan!”  va darhol yana qaytara boshladi, ajablanarlisi u hech ham charchamasdi”, — deydi u.