Toshkent shahrining Yashnobod tumanida qalbaki 2 ming dollarni bankomat orqali so‘mga ayirboshlagan shaxslar aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Yashnobod tuman bo‘limi tomonidan AITB “Ipak yo‘li bank” Amaliyot boshqarmasining murojaatiga asosan tergovga qadar tekshiruv o‘tkazilgan. Tekshiruv davomida S.F. ismli shaxs va boshqalar ushbu bank filialiga tegishli Parkent ko‘chasida joylashgan bankomat orqali qalbaki 2 ming dollarni so‘mga ayirboshlab olgani aniqlangan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan oldin Toshkentda 27 yoshli shaxs to‘lov infokioskini Nexia’siga ortib, o‘g‘irlab ketgani, Farg‘onada 18 yoshli yigit bankomatni buzayotganida qo‘lga tushgani, Andijonda bankomatni buzib, undagi pullarni o‘g‘irlashga uringan shaxs qo‘lga olingani to‘g‘risida xabar berilgandi.
Izoh (0)