Mashhur futbol agenti Mino Rayolaning 54 yoshida vafot etgani haqida xabar berilgandi. U Erling Holand, Pol Pogba, Zlatan Ibrahimovich va boshqa bir qator yulduzlar bilan hamkorlik qilardi.
Tuttomercatoweb’ning ma’lum qilishicha, Minoga amakivachchasi Vinchenso Rayola vorislik qiladi. Bu uning oilasi, xususan, kelajakda otasining ishini davom ettirishni rejalashtirayotgan farzandlarining xohishidir.
Qayd etish kerak, Vinchenso oxirgi 15 yil davomida Rayolaga yordam berib kelgan va uni barcha futbolchilar Minoning merosxo‘ri sifatida tan olgan. Janluiji Donnarumma va Matteys de Ligt unga ishonch bildirgani haqida aniq ma’lumotlar bor.
Kelasi yozdan esa faoliyatini davom ettirish yoki tugatish borasida bir qarorga kelmagan Zlatan Ibrahimovichning ham Minoga tegishli bo‘lgan agentlikda ish boshlashi mumkinligi aytilmoqda. Ma’lumki, shvetsiyalik futbolchi Rayola bilan iliq munosabatlarda bo‘lgan.
Eslatib o‘tamiz, 28-aprel kuni Mino Rayolaning vafoti haqidagi xabarlar tarqalgandi. Ammo oradan biroz vaqt o‘tib, uning o‘zi Twitter tarmog‘ida hammasi joyida ekanligi, lekin chiqayotgan xabarlardan g‘azabda ekanligini yozib qoldirdi. 30-aprel kuni esa agentning vafot etganini uning oila a’zolari tasqidladi. O‘limga uzoq davom etgan o‘pka kasalligi sabab bo‘lgani aytildi.
Mino Rayola 1967-yil 4-noyabrda Italiyada tavallud topgan. Futbol olamida Pol Pogba, Erling Holand, Zlatan Ibrahimovich, Mario Balotelli, Genrix Mxitaryan, Marko Veratti, Janluiji Donnarumma, Jastin Klyuyvert, Matteys de Ligt va yana ko‘plab futbolchilarning agenti sifatida mashhur edi.
Mino 1990-yilda Sports Promotions’da futbol agenti sifatida faoliyatini boshlagan. Ushbu kompaniyada ish boshlagan agent 1992-yilda Brayan Royning “Ayaks”dan “Fodja”ga o‘tishi bilan shug‘ullangan. Bir necha yildan so‘ng Rayola mustaqil agent sifatida kompaniyani tark etgan. Ilk katta transferi esa Pavel Nedvedning “Sparta”dan “Latsio”ga o‘tishi bo‘lgan. 2020-yildan buyon dunyoning eng mashhur va ta’sir doirasi keng agentlardan biriga aylangandi.
Izoh (0)