Konor Makgregor oktagonga qaytib, chempionlik jangida ishtirok etishi mumkin
Ikki vazn toifasida UFC sobiq chempioni Konor Makgregor yarim o‘rta vazn toifasida titul jangi o‘tkazishi mumkin. Bu haqida sobiq UFC jangchisi Cheyl Sonnen ma’lum qildi.
Qayd etilishicha, Kamaru Usmonga raqib bo‘lishi belgilangan Leon Edvardsga mazkur jangdan voz kechishi uchun pul taklif etilgan.
“Menga Leon Edvardsga taklif bo‘lganini aytishdi. Ular Leonga Kamaru Usmon bilan jang uchun kelishilgan gonorar va g‘alaba uchun bonus to‘lashga tayyor ekan. Barchasi u chetga chiqishi va Konor bu ishga aralashishi uchun qilinmoqda”, — deydi Cheyl.
Edvards rasman -77 kg vazn toifasidagi kamar uchun da’vogar hisoblanadi. Makgregor ayni damda 2021-yil yozida Dastin Poryega qarshi jangda olgan jarohatini tuzatishda davom etmoqda.
Hozirda yarim o‘rta vazn toifasida Kamaru Usmon chempion bo‘lib turibdi. Usmon 2021-yil noyabr oyida Kolbi Kovington bilan jang o‘tkazib, kamarni muvaffaqiyatli himoya qilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
