Buxoro shahrida o‘zganing yuklagich mashinasini olib qochgan shaxs aniqlandi, deb xabar bermoqda Tergov departamenti.
Qayd etilishicha, 5 aprel kuni soat 14:44 da viloyat IIBning 102 raqamiga tarjimon bo‘lib ishlovchi N.A. (50 yoshli) murojaat qilgan. U 4-aprel kuni Sheyxon ko‘chasidan o‘tuvchi Xorazm—Buxoro yo‘lining bo‘yida qarovsiz qoldirilgan, Janubiy Koreya Respublikasi fuqarosi, Sun Chang Trade MCHJ rahbari K.M.ga (62 yoshli) tegishli XGMA old g‘ildirakli yuklagich mashinasini noma’lum shaxs haydab olib ketganligini ma’lum qilgan. Fuqaro ushbu noma’lum shaxsga nisbatan qonuniy chora ko‘rishni va yuk ko‘taruvchi avtomashinasini topishda amaliy yordam berishni so‘ragan.
Olib borilgan tergov tezkor harakatlari natijasida ushbu jinoyatni Buxoro shahrida yashovchi B.I. (49 yoshli) sodir etgani aniqlanib, ushlangan.
Qonunbuzardan u tomonidan olib qochilgan yuklagich mashinasi qayerda ekani va nima sababdan ushbu jinoyatga qo‘l urgani haqida so‘ralganda u ushbu avtomashinani Kogon shahar Xorazm ko‘chasida joylashgan pochchasining hovlisiga haydab borib qo‘yganini bildirgan. Erkak keyinchalik mashinani sotib yubormoqchi bo‘lgan. Mazkur mashina ashyoviy dalil tariqasida rasmiylashtirib olingan.
Holat yuzasidan Jinoyat kodeksning 267-moddasi 1-qismi (transport vositasini olib qochish) bilan jinoyat ishi qo‘zg‘atilgan. Tergov harakatlari davom etmoqda.
Jinoyat kodeksining normalariga ko‘ra, jinoyatni sodir etgan shaxs 5 yildan 10 yilgacha ozodlikdan mahrum qilish bilan jazolanishi mumkin.
Izoh (0)