Ijtimoiy tarmoqda Andijon viloyatining Shahrixon tumanida hokimlik tomonidan dehqonning 3,5 gektardan iborat bog‘idagi daraxtlari kesilayotgani aytilgan video tarqaldi. Shahrixon tumani hokimligi ushbu holatga munosabat bildirib, voqeaga hokimlikning aloqasi yo‘qligini ma’lum qildi.
Qayd etilishicha, tumanning “Abdubiy” massivi hududidagi “Komiljon kelajak mevasi” fermer xo‘jaligi rahbari Komiljon Hoshimovning 2020-yil 18-fevraldagi arizasiga asosan 12,7 gektar yer maydoni tuman hokimining 2020-yil 27-martdagi qarori bilan tuman zaxirasiga qaytarilgan. Zaxiraga olingan mazkur yer maydonining 6,5 gektari hokimning 2021-yil 27-maydagi qarori bilan tender tanlovida g‘olib bo‘lgan “Vodiy invest ziynati” mas’uliyati cheklangan jamiyatiga qishloq xo‘jaligi birlashmalarini tashkil etish maqsadida 30 yil muddatga ijaraga berilgan.“‘Vodiy invest ziynati’ MCHJ mas’ullari ushbu yer maydonida uzumzor tashkil qilish uchun yangi loyiha ishlab chiqqan. Va yerni ijaraga olib ishlatayotganini bildirib, undan noqonuniy foydalanib kelgan fuqarolarga bu haqda aytib, tushuntirish bergan. Hamda ularga mavjud daraxtlarining xarajatlarini qoplab berishni kafolatlagan. Biroq bog‘ga noqonuniy egalik qilib kelayotganlar yerning yangi egasiga qarshilik ko‘rsatib, uning faoliyatiga to‘sqinlik qilgan. Shundan so‘ng ‘Vodiy invest ziynati’ MCHJ ishchilari yangi uzum ko‘chatlarini ekish maqsadida bog‘dagi mavjud daraxtlarni kesgan. Hamda ijarachilar bilan o‘zaro tortishgan. Bu jarayonga tuman hokimligining hech qanday aralashuvi bo‘lmagan. Ushbu holat yuzasidan huquqni muhofaza qiluvchi idoralar tomonidan surishtiruv ishlari olib borilmoqda”, — deyiladi hokimlikning rasmiy axborotida.