Ижтимоий тармоқда Андижон вилоятининг Шаҳрихон туманида ҳокимлик томонидан деҳқоннинг 3,5 гектардан иборат боғидаги дарахтлари кесилаётгани айтилган видео тарқалди. Шаҳрихон тумани ҳокимлиги ушбу ҳолатга муносабат билдириб, воқеага ҳокимликнинг алоқаси йўқлигини маълум қилди.
Қайд этилишича, туманнинг «Абдубий» массиви ҳудудидаги «Комилжон келажак меваси» фермер хўжалиги раҳбари Комилжон Ҳошимовнинг 2020 йил 18 февралдаги аризасига асосан 12,7 гектар ер майдони туман ҳокимининг 2020 йил 27 мартдаги қарори билан туман захирасига қайтарилган. Захирага олинган мазкур ер майдонининг 6,5 гектари ҳокимнинг 2021 йил 27 майдаги қарори билан тендер танловида ғолиб бўлган «Водий инвест зийнати» масъулияти чекланган жамиятига қишлоқ хўжалиги бирлашмаларини ташкил этиш мақсадида 30 йил муддатга ижарага берилган.«‘Водий инвест зийнати’ МЧЖ масъуллари ушбу ер майдонида узумзор ташкил қилиш учун янги лойиҳа ишлаб чиққан. Ва ерни ижарага олиб ишлатаётганини билдириб, ундан ноқонуний фойдаланиб келган фуқароларга бу ҳақда айтиб, тушунтириш берган. Ҳамда уларга мавжуд дарахтларининг харажатларини қоплаб беришни кафолатлаган. Бироқ боғга ноқонуний эгалик қилиб келаётганлар ернинг янги эгасига қаршилик кўрсатиб, унинг фаолиятига тўсқинлик қилган. Шундан сўнг ‘Водий инвест зийнати’ МЧЖ ишчилари янги узум кўчатларини экиш мақсадида боғдаги мавжуд дарахтларни кесган. Ҳамда ижарачилар билан ўзаро тортишган. Бу жараёнга туман ҳокимлигининг ҳеч қандай аралашуви бўлмаган. Ушбу ҳолат юзасидан ҳуқуқни муҳофаза қилувчи идоралар томонидан суриштирув ишлари олиб борилмоқда», — дейилади ҳокимликнинг расмий ахборотида.
Изоҳ (0)