JSST: Dunyoda koronavirusdan vafot etganlar soni bir haftada 43 foizga o‘sdi

21—27-mart kunlari butun dunyo bo‘ylab 10 milliondan ortiq odamda koronavirus aniqlandi, 45 mingdan ortiq bemor vafot etdi, deb xabar beradi Jahon sog‘liqni saqlash tashkiloti.

Tashkilot ma’lumotlariga ko‘ra, kasallanish avvalgi haftaga nisbatan 14 foizga kamaygan, biroq COVID-19 asoratlari oqibatida vafot etish ko‘rsatkichi 43 foizga o‘sgan.

JSST hisobotida keltirilishicha, butun dunyoda hafta davomida koronavirusga chalinish holatlari kamayib borayotgani kuzatilmoqda. Shuningdek, to‘rtta mintaqada o‘lim holatlari qisqargani ham qayd etilgan. 27-mart holatiga ko‘ra, butun dunyoda 479 milliondan ortiq odam koronavirusga chalingan va 6 milliondan ortiq bemor vafot etgan.

“2022-yilning yanvaridan mart boshiga qadar COVID-19 bilan yangi kasallanish holatlarining barqaror tendensiyasi kuzatildi, shundan so‘ng, ketma-ket ikki hafta davomida koronavirus bilan kasallanish holatlari o‘sdi”, — deyiladi xabarda.

O‘tgan haftada JSST kovid bilan kasallanish holatlari ko‘plab mamlakatlar keskin va tezkorlik bilan cheklovlarni bekor qilgani sabab ortib ketganini ma’lum qilgandi. JSST ma’lumotlari bo‘yicha kasallanish holatlarining o‘sishi Yevropadagi 53 ta davlatning 18 tasida qayd etilgan.

Avvalroq Xitoyning Shanxay shahrida koronavirusining avj olishi fonida, 28-mart, dushanba kunidan so‘nggi ikki yildagi eng yirik lokdaun joriy qilingani to‘g‘risida xabar berilgandi.