Checheniston rahbari Ramzan Qodirov Rossiyaning Ukrainadagi “maxsus operatsiyasi” davomida Kiyevni qo‘lga kiritish kerakligini aytdi. Bu haqda u Rossiya Kiyev yo‘nalishidagi harbiy faollikni kamaytirgandan keyin Grozniyda harbiy kuchlarning keng ko‘lamli yig‘ilishida aytgan, deb yozadi “RIA Novosti”.
“Men to‘xtab qolmaslik, boshlangan ishni oxiriga yetkazish zarurligini ta’kidlayman. Biz Kiyevga borib, Kiyevni olishimiz kerak. Agar Kiyev atrofida qolganimizda edi, Kiyevga borib, hamma narsani tartibga keltirgan bo‘lardik”, — dedi Qodirov.
Checheniston rasmiylarining ma’lumotlariga ko‘ra, 28-mart kuni Ramzan Qodirov Rossiya qamalida bo‘lgan Mariupolga tashrif buyurgan. Safardan so‘ng Qodirov ijtimoiy tarmoqlarda “Donbassning tinch aholisini himoya qilish va Ukrainadagi maxsus operatsiyani mantiqiy g‘alaba bilan yakunlash bizning bevosita mas’uliyatimiz”, — deb yozdi.
29-mart kuni Istanbulda Rossiya—Ukraina muzokaralarining navbatdagi raundi bo‘lib o‘tdi, shundan so‘ng Rossiya mudofaa vaziri o‘rinbosari Aleksandr Fomin Rossiya Kiyev va Chernigov yo‘nalishlarida harbiy faollikni “keskin qisqartirishi”ni ma’lum qildi. CNN Amerika manbalariga tayanib xabar berishicha, Qo‘shma Shtatlar Rossiya o‘z qo‘shinlarining bir qismini Kiyevdan olib chiqib ketayotganiga guvoh bo‘lmoqda.
O‘sha kuni Rossiya Mudofaa vaziri Sergey Shoygu Ukrainadagi maxsus harbiy operatsiyaning asosiy vazifalari bajarilganini, shuning uchun endi asosiy maqsad – Donbassni ozod qilishga e’tibor qaratish imkoniyati borligini aytdi.
Eslatib o‘tamiz, Rossiya prezidenti Vladimir Putin 24-fevral kuni Ukrainada “maxsus harbiy operatsiya” boshlanganini e’lon qildi. U o‘z maqsadlarini Ukrainani demilitarizatsiya qilish va Donbass aholisini “genotsid”dan himoya qilish deb atadi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)