“Sevgi”, “Shukrona”, “Sensiz” seriallari qahramoni aktrisa Odina To‘xtasinova saraton kasali sabab 13 marotaba jarrohlik operatsiyasini boshidan o‘tkazganini ma’lum qildi.
Aktrisa bu haqida YouTube’dagi YashinTV kanaliga bergan intervyusida gapirib berdi.
Katta farzandimni dunyoga keltirganimdan keyin poliklinikaga chiqsam “siz onkologiyaga borishingiz kerak” deyishdi. Keyin Oqtepadagi onkologiyaga borsam tezda operatsiya qilish kerakligini aytishdi. O‘sha haftaning o‘zida operatsiya qildirdik. “Operatsiya qanday bo‘ldi bilasizmi?”, “Narkozsiz bo‘ldi, birinchi, bezni olib tekshirishimiz kerak deyishdi”. Meni boylab qo‘yishdi. Hamma narsani ko‘rib, bilib turibman. Birinchi operatsiyam o‘tdi, oradan vaqt o‘tdi. Yana xuddi shunaqa paydo bo‘ldi, keyin boshqa, Beruniydagi onkologiya kasalxonasiga bordim. U yerda yana kesishdi, xullas, uydagilar bilib-bilmagani qancha bo‘ldi.Ma’lumot uchun, aktrisa Odina To‘xtasinova 1988-yil, 26-fevral kuni Farg‘ona viloyati, Beshariq tumanida dunyoga kelgan. Oilali, ikki farzandning onasi.Operatsiya qildiraman, yana uyga ketaman. Bu narsa o‘n bir marotaba takrorlandi. Narkozdan chiqar-chiqmas limon bilan qatiq olaman, limonni shundoqligicha shimaman va “bolalarimga qarashim kerak, ovqat qilishim kerak”, deb uyga ketaman. Doktorlar esa “qozonni tepasiga borma, quyoshga chiqma” deyishardi.
Uydagilarga kasalligimni aytsam “bu rak bo‘lib qoldi”, deb, “aza ochib yuborishadi, menga rahmlari keladi”, deb o‘ylab aytmaganman. O‘n bir marotaba operatsiya bo‘lgandan keyin charchadim. Har safar kelaman, xo‘rozni so‘ygandek so‘yishadi, yana jo‘natib yuborishadi.
Doktor bilan gaplashib, “endi nima qilishim kerak”, deganimda, ular “yana tashxis topshirib keling” dedi. U shifokorni yomonlash emas, balki kasblari yetuk mutaxassis emasdur. Tashxis natijalarini olib kelsam “kimyoviy terapiya”, qilish kerakligini aytishdi. Keyin “tananing bu qismini olib tashlaymiz, ko‘payib ketibdi”, deyishdi. Men esa “qanday qilib? Axir men yoshman, hali tug‘gim kelyapti”, dedim. Doktor esa “tug‘ish mumkin emas, tug‘sang o‘lib ketasan” dedi.
Undan oldin esa “bola tug‘sang o‘zi so‘rilib ketadi”, deyishgani uchun, men ikkinchi farzandimni tezlik bilan dunyoga keltirgandim. O‘sha so‘zlarni eshitib yig‘lab, Aziza opamni oldiga bordim. Ularga, shifokorlar aytganidek “ikkinchi tomonga ham o‘tadi, tepaga chiqib ketibdi”, deb aytdim.
Aziza opa esa “men senga hujjatlarga yordam beraman, chet elda tekshirtirib ko‘rgin dedi. Keyin chet elda tekshirtirsam, mendan katta pul va vaqt so‘rashdi. Ma’lum bo‘lishicha, bizning shifokorlar qayta-qayta kesaverib, a’zo ichini ham shiram qilib tashlabdi. Xatoning ustiga xato bo‘lavergan ekan.
Koreyada operatsiyam uchun ishlab, pul yig‘dim. Onam 3 yoki 4 marotaba operatsiya bo‘lganimni biladilar, xolos, boshqalarini bilmaydilar. Koreyada ham operatsiya kunim aniqlangan, ammo buni hech kim bilmaydi. Hech kimga aytolmayman. Qo‘rqmasdan 7-8 soatlik operatsiyaga kirganman.
Nimadirlar ulashdi, “narkozlar beramiz”, deyishdi, “kindigingni kesamiz”, deyishdi. Operatsiyadan chiqsam, pul faqat operatsiyaga yetibdi. Besh-olti kun yotishga yetmadi. Pulim faqat bir kunimga yetdi. U paytda esa men faqat uxlaganman. Ertasi kuni esa kasalxonaga yotolmay uyimga chiqib ketdim. Endi og‘riqni aytmay qo‘yaqolay. Oldimda hech kim yo‘q, menga qaraydigan bir mehribon yo‘q. Og‘riqdan dod deb nafas ololmayman. Uyda hamma narsani turtib tashlayman, butun tanam kesib tashlangan. Yana oldimda hech kim yo‘q. Uning ustiga onam internetdan qo‘ng‘iroq qilaveradilar. Ko‘ngillari sezgan shekilli. Onam chidolmay “men hozir seni qidiruvga beraman, elchixonaga boraman”, dedilar. Keyin Imodan qo‘ng‘iroqni ko‘tardim. Onam esa “dod dedilar, meni Koreyaga olib ket, men chidolmayman”, dedilar. “Ona viza qilolmaysiz, kelolmaysiz”, dedim. “Unda buyoqqa kel dedilar”. “Men yurolmayman”, deb nafas ololmaydigan darajada og‘riqni his qildim.
Operatsiya o‘tdi. “Yaxshisan deyishdi”. “O‘zbekiston shifokorlarining hamma tashxisi esa xato deyishdi”, “O‘n bir martta xato operatsiya qilishgan”, degan xulosaga kelishdi.
Koreyalik shifokorlar “bu barchasi bitta operatsiyada hal bo‘ladigan narsa ekanini, o‘zbekistonlik shifokorlar esa qayta-qayta kesib, ko‘paytirib yuborganini aytdi. Bir yildan keyin qayta tashxis topshirsam, “ikkinchi tomoningga ham o‘tgan”, deyishdi. Buni ham onamga aytolmadim. Shunda “Koreyada bir oy toshbaqa sho‘rva ichsang, yaxshi bo‘lib ketasan”, deyishdi. Doktorga pulim yo‘qligi uchun, dengiz bo‘yida bir oy yashab toshbaqa sho‘rva ichdim. U kuchli narsa bo‘lganiga qon bosimim ko‘tarilib ketdi, bosh og‘rig‘imga esa chidolmayman, suvning bo‘yiga chiqib dod, dod deb yig‘lardim.
Lekin odamlar “o‘tini operatsiya qilgan, bo‘tini operatsiya qilgan”, deyaverishadi. Hammaga dardingizni aytavermaysiz-ku. Ular “puling bormi, nima yordam kerak?”, deyishmaydi.
Keyin baribir doktorga bordim, toshbaqa ta’sir qilmabdi. Shundan keyin yana bir kichik operatsiya qildirdim va hozir yaxshiman.
Sizlarga maslahatim yaxshilab tekshirtirib, keyin operatsiya qildiringlar.
Odina To‘xtasinova, aktrisa
Izoh (0)