Ijtimoiy tarmoqlarda O‘zbekiston xalq artisti Yulduz Usmonova konsert dasturida muxlislarga qo‘pol ohangda gapirib, nomunosib munosabatda bo‘lgani aks etgan videolavha tarqalgan edi. Iste’molchilar huquqlarini himoya qilish jamiyatlari federatsiyasi raisi o‘rinbosari Inomjon Tagayevning so‘zlariga ko‘ra, mazkur holat bo‘yicha “O‘zbekkonsert” bilan o‘rganish ishlari o‘tkaziladi.
Tarqalgan videodan ko‘rish mumkinki, O‘zbekiston xalq artisti Yulduz Usmonova 12-mart kuni Toshkentdagi “Xalqlar do‘stligi” saroyida o‘tkazilgan konsertida muxlislarga qo‘pol muomalada bo‘lgan.
Tagayevning aytishicha, ushbu holat bo‘yicha “O‘zbekkonsert” davlat muassasasi bilan bog‘lanilgan.
“Litsenziya beruvchi tashkilot — ‘O‘zbekkonsert’. Ularda bundan tashqari, san’atkorning litsenziya talablari ham bor. Ya’ni san’atkor odob-axloq qoidalariga rioya qilish kerak. Holat to‘liq o‘rganiladi. Tomoshabinlar bilan dastlabki suhbatda, so‘zlarni (qo‘shiqchi gapirgan — tahr.) tahlil qilib shuni bildikki, odob-axloq qoidalari buzilgan… Iste’molchiga bunaqa qo‘pol muomala qilish qonun bo‘yicha taqiqlangan, bu bo‘yicha ‘O‘zbekkonsert’ bilan bevosita jarayonni o‘rganib chiqib, yakuniy xulosamizni aytamiz”, — deydi u.
Qayd etilishicha, “Xalqlar do‘stligi” san’at saroyida bo‘lib o‘tayotgan konsertning 12-mart kunidagi dasturida texnik nosozlik tufayli sahna pardasi to‘laligicha ochilmay qolgan va bunga tomoshabinlar e’tiroz bildirgan. Xususan, ulardan biri qo‘pol ohangda baqirgan. Yulduz Usmonova buni haqorat deb tushungan va emotsiyaga berilib ketib, konsertga tashrif buyurgan tomoshabinlarga nisbatan qo‘pol munosabatda bo‘lgan. Holatga Madaniyat vazirligi ham munosabat bildirgan bo‘lib, “san’atkordan madaniyat talab qiladigan jamiyat ommaning hordiq chiqarishiga xalaqit qiladigan tomoshabinlarni ham tartibga chaqirishi kerakligini”ni ta’kidlagan.
Izoh (0)