Toshkentning maydoni 65 gektar bo‘lgan alohida ekotizimi — Botanika bog‘idan fotoreportaj

Toshkentning janubi-sharqiy qismida joylashgan Botanika bog‘i maydoni 65 gektar bo‘lgan alohida ekotizim hisoblanadi. U tirik o‘simliklar to‘plamiga (genofond) ega va mamlakatdagi eng noyob obyekt sifatida baholanadi.

Botanika bog‘ida hozirgi kunda 43 gektar dendrariy, 5 gektar manzarali pitomniklar, 1 gektar tropik va subtropik o‘simliklarning oranjereyasi, shuningdek, issiqxona va 16 gektar ihotazor daraxtlar mavjud. Dendrariy o‘simlik dunyosini tabiiy mintaqalarga bo‘lib o‘rganishga asoslangan holda tashkil qilingan (Engler tizimi bo‘yicha).

“Daryo” fotomuxbiri bog‘ hududidan fotoreportaj tayyorladi.

Botanika bog‘ida 10 kilometrdan ortiq asosiy yo‘laklar mavjud. Qishki bog‘ (oranjereya) laboratoriya binosi bilan birgalikda 6 ta blokdan tashkil topgan 1200 metr kvadrat maydonni o‘z ichiga olgan. Botanika bog‘i issiqxonasi qishda ham tropik va subtropik o‘simliklar kolleksiyasi bilan o‘z yashilligi va ko‘rkamligini saqlab turadi.

Hozirgi kunda Botanika bog‘ida 3 ta ilmiy laboratoriya mavjud bo‘lib, ularda 20 ta ilmiy xodim ishlaydi. So‘nggi 3 yil ichida 1 ta doktorlik va 4 ta nomzodlik dissertatsiyalari himoya qilindi va ushbu tadqiqotchilar tadqiqot ishlarini samarali davom ettirmoqda.

Botanika bog‘i faoliyati, uni rivojlantirishning ustuvor yo‘nalishlari Fanlar akademiyasi rahbariyati va Innovatsion rivojlanish vazirligi tomonidan tizimli ravishda amalga oshirib kelinmoqda.