Mashhur britaniyalik juftlik Ukraina va Rossiya o‘rtasidagi urushda jabr ko‘rgan bolalar uchun xayriya aksiyasini boshladi.

Ko‘plab jahon yulduzlari Ukraina xalqiga nafaqat ijtimoiy tarmoqlardagi hamdardlik xabarlari bilan, balki moliyaviy jihatdan ham yordam berishga qaror qildi.

Misol uchun, britaniyalik yozuvchi Joan Rouling ukrainalik bolalarga yordam berish uchun million dollardan ortiq xayriya qildi. Bu tashabbusga yana bir mashhur britaniyalik, ya‘ni Bekhem juftligi qo‘shildi.

Devid Bekhem o‘zining Instagram’dagi sahifasida Ukraina bolalari uchun mablag‘ yig‘ish haqida video joyladi:

Onalar farzandlari bilan qochishga majbur. Oilalar ajralgan. Yotoqlaridan ayrilgan bolalar bir kechada qochqinga aylandi. Ukrainadagi nizoning ikkinchi haftasi davom etar ekan, oilalarning ehtiyojlari oshib bormoqda va ayni paytda 7,5 million bola xavf ostida.

Ukrainalik oilalarga yordam berish uchun sportchi UNICEF xayriya jamg‘armasi bilan birgalikda mablag‘ yig‘ish tashabbusi bilan chiqdi.

https://www.instagram.com/tv/Ca1xzXVIiQx/?utm_source=ig_web_copy_link

Shuningdek, Devid Bekhemning rafiqasi Viktoriya ijtimoiy tarmoqdagi sahifasida ukrainalik qochqinlarga yordam beradigan barcha xalqaro jamg‘armalar nomi yozilgan post joyladi.

“Bugun, Xalqaro xotin-qizlar kunida men hozirda bizning yordamimizga eng muhtoj bo‘lgan, Ukrainadagi halokatli urushdan jabr ko‘rgan ayollar va bolalarni qo‘llab-quvvatlash imkoniyatidan foydalanmoqchiman”, — deb yozadi Viktoriya.

Eslatib o‘tamiz, Gollivud yulduzlari Rayan Reynolds va Bleyk Layvli ukrainalik qochoqlar uchun million dollar xayriya qilgandi. Shuningdek, jahonga mashhur aktrisa Anjelina Joli ham Ukrainadagi vaziyatga munosabat bildirib, tinch aholiga yordam berishini ma’lum qilgan. Aktrisa uzoq vaqtdan beri BMTning yaxshi niyat elchisi sifatida butun dunyo bo‘ylab qochqinlarni qo‘llab-quvvatlab keladi.