Rossiya Markaziy banki rossiyaliklarning xorijiy valyutadagi hisob raqamlaridan naqd pul berishni vaqtincha chekladi. Bu haqda regulyator saytida ma’lum qilindi.
Rossiya banklari mijozlari o‘z hisob raqamlari yoki omonatlaridan 10 ming dollargacha naqd pul yecha oladi. Qolgan mablag‘lar pul olingan kundagi bozor kursi bo‘yicha rublda beriladi.
“Mazkur vaqtinchalik muddat davomida valyuta hisob raqamidan qat’i nazar AQSh dollarida beriladi. Qolgan valyutalarni AQSh dollariga konvertatsiya qilish shu kungi bozor kursida amalga oshiriladi”, — deyiladi xabarda.
Markaziy bankning ta’kidlashicha, Rossiya fuqarolari xorijiy valyutalarda hisob raqamlari va omonatlarni saqlashda davom etishlari mumkin bo‘ladi, ularning shartlari o‘zgarmaydi. Xorijiy valyutadagi yangi hisob raqamlarini ochishga ham ruxsat berilgan.
Cheklovlar 9-martdan kuchga kirgan bo‘lib, 9-sentabrga qadar amalda bo‘ladi.
Eslatib o‘tamiz, Rossiya 24-fevralda Ukrainada maxsus harbiy operatsiya boshlagan, ikki davlat o‘rtasidagi urushning 13-kuni davom etmoqda. 2-mart kuni Vladimir Putin Rossiya hududidan 10 ming dollardan ortiq valyuta olib chiqib ketishni taqiqlash to‘g‘risidagi farmonni imzolagandi. Mazkur farmon “AQSh hamda unga qo‘shilgan xorijiy davlatlar hamda xalqaro tashkilotlarning Rossiyaga qarshi sanksiyalar qo‘llash bilan bog‘liq do‘stona bo‘lmagan va xalqaro huquqqa zid harakatlari munosabati bilan” imzolangan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)