Andijon viloyatining Xonobod va Xorazm viloyatining Xiva tumanlarida fuqarolarni noqonuniy tarzda o‘qishga kiritib qo‘yish bilan bog‘liq jinoyatlar aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Xonobod shahar bo‘limi tomonidan IIB bilan hamkorlikda tezkor tadbir o‘tkazilgan. Unda fuqaro U.M. firibgarlik yo‘li bilan daromad orttirish maqsadida fuqarolar O. va N.ning ishonchiga kirib, ularni 7 ming dollar evaziga Qirg‘iziston O‘sh davlat universitetiga o‘qishga kiritib, keyinchalik o‘qishini Andijon davlat universitetiga ko‘chirib berishni va’da qilgani aniqlangan. U oldindan 2 ming dollar olgan vaqtida ashyoviy dalillar bilan ushlangan.
Shuningdek, departamentning Xiva tuman bo‘limi tomonidan DXX bilan o‘tkazilgan tezkor tadbirda ham shunga o‘xshash holat aniqlangan. Fuqarolar M.A. va B.S. oldindan til biriktirib, fuqaro G.ni Qozog‘istondagi oliy ta’lim muassasasining yurisprudensiya yo‘nalishiga o‘qishga kiritib, keyinchalik tanishlari orqali o‘qishini Toshkent davlat yuridik universitetiga ko‘chirib berish evaziga 1000 dollar olgan vaqtida ashyoviy dalillar bilan ushlangan
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Qashqadaryoda Milliy gvardiyaga ishga kiritib qo‘yish uchun 4 ming dollar olgan shaxs ushlandi
- Jizzax davlat pedagogika instituti bo‘lim boshlig‘i 100 ming dollar pora bilan ushlandi
- Qashqadaryoda fuqarodan ukasi va jiyanining xorijdagi o‘qishini QarDUga ko‘chirib berish uchun 6 ming dollar olgan shaxs ushlandi