Lionel Messi 4 yildan beri “Real”ga gol ura olmayapti

Chempionlar Ligasi 1/8 finalining dastlabki o‘yinida “PSJ” o‘z maydonida “Real”ni (1:0) mag‘lub etdi.

Uchrashuvning 62-daqiqasida parijliklar hujumchisi Lionel Messi penaltidan gol ura olmadi. Ushbu vaziyatda “Real” darvozaboni Tibo Kurtua seyv amalga oshirdi.

Shu tariqa Messining Chempionlar Ligasida noaniq amalga oshirgan penaltilari soni 5 taga yetdi. Argentinalik futbolchi bu borada “Arsenal” sobiq hujumchisi Tyerri Anrining antirekordini takrorladi.

Umumiy hisobda Lionel ushbu turnirda 23 marta penalti tepgan.

Shuningdek, Messi “Real” darvozasiga ilk marta penaltidan gol ura olmadi. U bungacha “Barselona”da o‘ynagan paytdagi 6 ta urinishining barchasini muvaffaqiyatli amalga oshirgandi.

Bundan tashqari, Messi ketma-ket 8 uchrashuvdan beri Madrid klubi darvozasiga yo‘l topa olmayapti. U “Real”ga o‘zining so‘nggi golini 2018-yilning may oyida urgan. Hujumchi bu vaqtda “Barselona”da to‘p surardi.

Ushbu g‘alaba, shuningdek, Messining Madrid klubiga qarshi o‘yinlardagi g‘alabasiz seriyasi yakun yasab berdi.

“Barselona”ning sobiq futbolchisi 2019-yilning mart oyidan beri “Real”ni mag‘lub eta olmayotgandi — 3 mag‘lubiyat va 1 durang.

Messi “qirollik klubi”ga qarshi 46 o‘yinda maydonga tushib, 26 ta gol va 14 golli uzatmaga mualliflik qilgan.