Futbol bo‘yicha Ispaniya La Ligasining 23-turida “Barselona” 6-fevral, yakshanba kuni “Atletiko”ni qabul qildi.
Uchrashuvning 8-daqiqasida madridliklar hisobni ochdi: Luis Suaresning uzatmasidan keyin Yannik-Ferreyra Karrasko to‘pni darvozaga joylab qo‘ydi. Oradan ikki daqiqa o‘tar-o‘tmas Xordi Alba chiroyli gol bilan muvozanatni tikladi. 21-daqiqada Adama Traorening qanotdan uzatgan to‘pini Gavi boshi bilan darvozaga aniq yo‘naltirdi.
Birinchi bo‘lim yakunlanishi arafasida Ronald Arauxo katalonlarning uchinchi golini urgan bo‘lsa, ikkinchi bo‘lim debyutida Dani Alves hisobni yirik ko‘rinishga olib keldi. 58-daqiqada Suares sobiq jamoasi darvozasini ishg‘ol qildi. 69-daqiqaga kelib, maydon egalari bir o‘yinchi kam bo‘lib qoldi: Dani Alves qo‘pol harakati sabab, videotakrorlardan keyin maydondan chetlatildi.
Ushbu g‘alabadan keyin Xavi shogirdlari ochkolari sonini 38 taga yetkazib olgan holda to‘rtinchi o‘ringa ko‘tarildi. “Atletiko” (36) esa beshinchi pog‘onaga tushib ketdi.
La Liga
23-tur bahslari
6-fevral, yakshanba
“Barselona” — “Atletiko” 4:2
Gollar: 0:1 – 8 Karrasko, 1:1 – 10 Alba, 2:1 – 21 Gavi, 3:1 – 43 Arauxo, 4:1 – 49 Dani Alves, 4:2 – 58 Suares.“Barselona”: ter Shtegen, Dani Alves, Pike, Arauxo, Alba, Buskets, de Yong, Pedri (Niko Gonsales, 66), Gavi (Dest, 71), Traore (Obameyang, 61), Ferran Torres.
“Atletiko”: Oblak, Vrsalko (Vass, 46), Savich, Ximenes, Ermoso (Mateus Kunya, 55), Koke (Errera, 76), de Paul, Lemar (Reynildu, 55), Karrasko, Suares, Joau Feliks (Korrea, 56).
Ogohlantirishlar: Alba (52), de Yong (72), Vass (89), Errera (90).
Chetlatish: Dani Alves (69).
Izoh (0)