“Chanchjen-4C” tashuvchi raketasi L-SAR 01 masofadan zondlash sun’iy yo‘ldoshini quyosh-sinxron orbitasiga olib chiqdi, deb xabar beradi Xitoy televizion tarmog‘i (CCTV).

Foto: China National Space Administration

“2022-yil 26-yanvar kuni Pekin vaqti bilan soat 07:44 da ‘Chanchjen-4C’ tashuvchi raketasi Szyusyuan kosmodromidan start olib, Yerni masofadan zondlash sun’iy yo‘ldoshi L-SAR 01 ni orbitaga olib chiqdi, parvoz to‘liq muvaffaqiyatli o‘tgan deya tan olindi”, — deyiladi telekanal xabarida.

Og‘irligi 3,2 tonnaga yaqin sun’iy yo‘ldosh apretudani radiolokatsion sintezlash texnologiyasi bilan jihozlangan. Ushbu texnologiya qurilma balandligi, ob-havo sharoiti va suratga olinayotgan obyektning yoritilishidan qat’i nazar, yuqori aniqlikda Yerni masofadan turib zondlashni amalga oshirish imkonini beradi. L-SAR 01 600 kilometr balandlikdagi quyosh-sinxron orbitasida turib, Yerni L-diapazonda masofadan zondlash imkoniyatiga ega. Uning asosiy vazifasi — geogolik muhitni monitoring qilish, ko‘chki va seysmik falokatlardan ogohlantirish.

Uch pog‘onali “Chanchjen-4C” tashuvchi raketasi Shanxay kosmik texnologiyalar agentligi tomonidan sun’iy yo‘ldoshlarni orbitalarga olib chiqish uchun yaratilgan. Ixtirochilarning so‘zlariga ko‘ra, u 2,8 tonnagacha foydali yukni quyosh-sinxron orbitasiga, 4,2 tonnani esa pastki orbitaga va 1,2 tonnani geotransfer orbitasiga olib chiqishga qodir.

Avvalroq Xitoy Maskning Starlink sun’iy yo‘ldoshlari ustidan BMTga shikoyat qilgani, Janubiy Koreya o‘zining birinchi kosmik raketasini uchirgani, biroq raketa sun’iy yo‘ldosh maketini orbitaga olib chiqa olmagani to‘g‘risida xabar berilgandi.