Toshkent va Istanbul o‘rtasidagi aviaparvozlar kuchli qor sabab bekor qilindi
Istanbul xalqaro aeroporti faoliyati to‘liq to‘xtatilgani sababli Uzbekistan Airways’ning 25-yanvar kuni uchishi rejalashtirilgan reyslari bekor qilindi. Bu haqda aviakompaniya matbuot xizmati xabar berdi.
Eslatib o‘tamiz, Istanbul xalqaro aeroportida noqulay ob-havo sharoiti (kuchli qor, ko‘rishning yetarli darajada emasligi) tufayli 25-yanvar kuni soat 07:40 da Toshkentdan Istanbulga uchishi kerak bo‘lgan HY-271 reysi 13:00 ga, Istanbul—Toshkent yo‘nalishi bo‘yicha uchishi kerak bo‘lgan HY-072 reys esa Istanbul vaqti bilan soat 12:30 dan 17:50 ga ko‘chirilgandi.
Xabarda aytilishicha, Toshkent —Istanbul—Toshkent yo‘nalishi bo‘yicha amalga oshirilishi lozim bo‘lgan ushbu ikki reys, shuningdek, HY-273, HY-274 reyslari bekor qilindi.
Bekor qilingan parvozlar yo‘lovchilari chiptaning to'liq qiymatini sotib olingan joyda qaytarish yoki 26-yanvar kuniga yoki parvozlar qayta tiklanganidan keyin har qanday kunga bepul ko‘chirish huquqiga ega.
O‘zbekistonning Istanbuldagi bosh konsulxonasi aeroport va yo‘llardagi tirbandlikni, hamda parvozlar bekor qilinganini e’tiborga olib, aeroportga bormaslikka chaqirdi.
Shuningdek, qayd etilishicha, ayni vaqtda aeroportda turli davlatlar fuqarolari to‘planib qolib, yeb-ichish, hojatxona, kutish, PZR-test topshirish, aloqa va boshqa muammolar ko‘zga tashlanmoqda. Aeroportda protest qilgan shaxslarga nisbatan politsiya tomonidan chora ko‘rilgani haqida ma’lumotlar olindi.
Bosh konsulxona aeroportda yo‘lovchilar noroziligi aks etgan videolavha ham e’lon qildi, biroq ko‘p o‘tmay uni kanaldan o‘chirib tashladi.
