Rossiyadagi o‘zbekistonlik migrantlarga yordam puli berilishi rad etildi

Tashqi mehnat migratsiyasi agentligi ijtimoiy tarmoqlarda Rossiyadagi mehnat muhojirlariga bir martalik yordam puli berilishi to‘g‘risida tarqalgan xabarlarga munosabat bildirdi.

Ta’kidlanishicha, so‘nggi vaqtlarda Tashqi mehnat migratsiyasi agentligi nomidan ijtimoiy tarmoqlarda fuqarolarni turli soxta xabarlar bilan chalg‘itish, hatto ma’lum miqdordagi to‘lov evaziga moddiy yordam berishni va’da qilayotgan holatlar uchramoqda.

Xususan, prezident qarori bilan fuqarolarga 132 dollar miqdorida bir martalik yordam puli berilayotgani, zarur oziq-ovqat va gigiyena vositalarini sotib olish uchun xorijda mehnat qilayotgan fuqarolarga BHMning 3 baravari (132 dollar) miqdorida bir martalik yordam ajratish tizimi mavjudligi, ushbu yordam pulini olish 4049 nafar kishi murojaat qilgani va shulardan 3971 nafariga yordam ko‘rsatilgani to‘g‘risida xabarlar tarqalgan.

Agentlik moddiy yordam so‘rab qaysi platforma orqali murojaat qilish mumkinligini eslatib o‘tgan. “Xorijda og‘ir ahvolga tushib qolgan mehnat migrantlari moddiy yordam so‘rab faqat ‘Birgamiz’ platformasi orqali murojaat qilishi mumkin. Moddiy yordam olish uchun hech qanday to‘lov talab etilmaydi”, — deyiladi munosabatda.

Avvalroq O‘zbekistonlik mehnat migrantlariga yordam berishga mo‘ljallangan Telegram-bot ishga tushirilgani, Rossiyada qiyin ahvolda qolgan 9 nafar o‘zbekistonlik charter reys bilan bepul vatanga qaytarilgani to‘g‘risida xabar berilgandi.