Zo‘ravonlikka qarshi kurashuvchi “Nemolchi.uz” loyihasi 27-dekabr kuni ijtimoiy tarmoqlarda Toshkent davlat pedagogika universiteti talabasi Mushtariybonu Komilovaning intim videolari tarqalganini ma’lum qildi. Oktabr oxirida u dekan o‘rinbosari Bog‘abek Yo‘ldoshev tomonidan tegajog‘likka uchrab, ikkinchi qavat derazasidan itarib yuborilganini bildirgandi.
Ta’kidlanishicha, qiz ushbu videoni o‘tgan qish yoki bahorda yigitiga yuborgan. “To‘g‘ri, ayrim kanallar qiz uni dekan o‘rinbosariga yuborgan deb yozmoqda”, — deyiladi xabarda.
Kuzda Mushtariybonu telefonini Faxriddin ismli tergovchiga tekshiruv uchun topshirgan. Dekabr boshida esa, loyiha ma’lumotlariga ko‘ra, Faxriddin Mushtariybonuga tergov ishiga aloqador bo‘lmagan, shaxsiy xarakterdagi xabarlarni yuborgan. Keyinchalik yozishmalar o‘chirib tashlangan.
“Biz ushbu skrinshotlarni IIV Tergov boshqarmasiga (tergovchi uning dugonasiga yuborgan qo‘shimcha ma’lumotlarni ham) yubordik va ushbu tergovchini ishdan chetlatish yoki bo‘shatishni so‘radik”, — deyiladi “Nemolchi.uz” xabarida.
“Ikki hafta oldin u tergovdan chetlashtirilgan. Bugun video paydo bo‘ldi”, — deya ma’lum qiladi loyiha.
“Nemolchi.uz” loyihasi bu borada yuzaga kelgan savolni o‘rtaga tashlagan: “IIV tergovchisi tergovga qadar tekshiruv ma’lumotlarini noqonuniy tarqatmoqdami?”. Loyiha tahririyati IIV qizning sha’niga dog‘ tushiradigan ma’lumotlarni tarqatgan barchani Jinoyat kodeksining tegishli moddalari bilan javobgarlikka tortishiga umid bildirmoqda.
“Gazeta.uz”ning Toshkent shahar IIBBga tayanib yozishicha, ushbu tergovchiga nisbatan xizmat tekshiruvi tayinlangan bo‘lib, uning natijalariga ko‘ra tegishli choralar ko‘riladi. Shu bilan birga poytaxt IIBB videoni tergovchi tarqatmaganini qayd etgan.
“Jabrlanuvchining telefonini ko‘zdan kechirish davomida intim xarakterga ega rolik topilmagan. Video tergovchi tomonidan tarqatilmagan”, — deyiladi idora izohida.
Voqea yuzasidan Saida Mirziyoyeva va Komil Allamjonov munosabat bildirib o‘tgandi. Saida Mirziyoyeva bunday holatlarni doimo jamoatchilikka ma’lum qilib turilishi uchun Senat, Bosh prokuratura, IIV va OAVning harakatini birlashtiradigan yirik loyiha zarurligini bildirib o‘tdi. Komil Allamjonov bu fikrga qo‘shilishini ma'lum qildi.
Izoh (0)