Toshkentda yanvardan 20 ta elektrobus yo‘lovchilarga xizmat ko‘rsata boshlaydi

Toshkentda yanvar oyidan boshlab 20 ta elektrobus shahar jamoat transporti yo‘lovchilariga xizmat ko‘rsatishni boshlaydi, deya xabar bermoqda “Podrobno.uz”.

“Yangi yilni xushxabarlar bilan boshlamoqchimiz. Ayni vaqtda 20 ta elektrobus sotib olish bo‘yicha muzokaralar olib boryapmiz, ularni yanvar oyi oxirigacha yo‘nalishlarga chiqarishga harakat qilamiz”, — dedi “Toshshahartransxizmat” kompaniyasining loyihalarni muvofiqlashtirish, tashqi aloqalar va investitsiyalar bo‘limi boshlig‘i Shahboz G‘ofurov.

Aynan qaysi ishlab chiqaruvchidan qanday rusumdagi avtobuslar sotib olinayotganiga aniqlik kiritilmagan. G‘ofurovning ta’kidlashicha, dastlabki reja bo‘yicha elektrobuslar dekabrdayoq olib kelinishi kerak edi, ammo “pandemiya va chegaralar yopiqligi bois logistika murakkablashgan va yetkazib berish kechikmoqda”.

Yangi avtobuslar shahar jamoat transportining aynan qaysi yo‘nalishlarida harakatlanishi ham hozircha noma’lum. Qayd etish joiz, 2019—2021-yillar davomida Toshkentda turli xorijiy (asosan, Xitoy) ishlab chiqaruvchilarning bir qator elektrobuslari sinovdan o‘tkazildi. Sinovdagi avtobuslarning aksariyati 51-yo‘nalish bo‘ylab harakatlantirilgan edi.

Ma’lumot uchun, Toshkent shahri jamoat transporti uchun kelgusi to‘rt yil davomida 1043 ta yangi avtobus va elektrobuslar sotib olinishi ko‘zda tutilgan.