Namangan shahrida sutka mobaynida uzluksiz ishlaydigan savdo va xizmat ko‘rsatish ko‘chalari paydo bo‘ladi. Bu haqda shahar hokimi G‘ofirjon Jamalov xalq deputatlari Namangan shahar kengashining 36-sessiyasidagi murojaatnomasida ma’lum qildi, deya xabar beradi “Daryo” muxbiri Azizbek Abduvaliyev.
G‘ofirjon Jamalovga ko‘ra, 2022-yilda Namangan shahrida xizmatlar sohasida jami 700 milliard so‘mlik 320 ta loyiha amalga oshiriladi. Buning hisobiga 1,5 ming yangi ish o‘rni yaratiladi.
“Shahardagi beshta — Navoiy, Bobur, Uychi, Amir Temur va Hamroh ko‘chalari o‘ziga xos xizmat ko‘rsatish markazlariga aylantiriladi. Ushbu ko‘chalardagi ko‘p qavatli turar joylarning yerto‘la va birinchi-ikkinchi qavatlarida 450 milliard so‘m evaziga savdo va xizmat ko‘rsatish obyektlari tashkil etiladi. Marg‘ilon, Sharshara va Nosir Ubaydullayev ko‘chalari esa 24 soat uzluksiz ishlaydigan savdo va xizmat hududi bo‘ladi”, — dedi shahar hokimi.
Murojaatnomada ta’kidlanishicha, shaharning ijtimoiy-iqtisodiy rivojlanishdan ortda qolayotgan to‘rtta mahallasida mahalliy tadbirkorlar tomonidan umumiy qiymati 17 milliard so‘mdan ortiq bo‘lgan 9 ta loyiha amalga oshiriladi va 700 ga yaqin ish o‘rni yaratiladi.
Shahardagi yana to‘rtta mahalla esa ixtisoslashuvidan kelib chiqib, kosibchilik, yog‘ochni qayta ishlash, ko‘chatchilik va hunarmandchilik hududlariga aylantiriladi hamda ularning aholisiga 1,6 milliard so‘m imtiyozli kredit ajratiladi.
Izoh (0)